Qullissat: Aaqqissuussamik aasarsiortitsinissaq taamaatiinnarneqartoq
Ilulissani Qullissat Ikinngutaat 1987-miilli Qullissani aasarsiortitsinermik aaqqissuisarpoq. Ukioq mannaanngitsorli.
Peqatigiiffiummi Upalungaarsimanermut Ataatsimiisitaliarsuup Sullorsuarmi, Vaigatimi, qaqqanit ulorianartumik sisoortoqarsinnaaneranik ukioq manna siusinnerusukkut nalunaaruteqarnera pimoorullugu tiguaa.
AAMMA ATUARUK Qullissani aasarsiortoqarnissaa inerteqqutigineqanngilaq
- Ilaasortagut piumagaluarput, uloriananngitsutut ilaatigut utoqqartatta taakkartoraluaraat. Kisiannili uagut uloriagalugu pisimaguvut. Aalajangerniarnerpullu taanna oqimaalaarsimasorujuuvoq, Ilulissani Qullissat Ikinngutaanni siulittaasoq, Nikolaj Gabrielsen, oqarpoq, nangillunilu:
- Tassa utoqqartatta arlallit ammaanersiornissaq piumasarigaluarpaat. Tassanili oqarfigisimavagut allatut ajornartumik aalajangernerput uagut ataqqillugu aamma pisariaqartut. Nalunarmat, ilumut ajutoortoqarpat, taava qanoq kinguneqassava?, Nikolaj Gabrielsen oqarpoq.
Nikolaj Gabrielsenilli ilanngullugu erseqqissaatigivaa Qullissani aasarsiorusuttut mattunneqanngitsut, taamaattorli aasarsiorniartut nammineq akisussaaffigalugu aasarsiorsinnaasut, matumanili Upalungaarsimanermut Ataatsimiisitaliarsuup sillimaniarnissamut innersuussutaanik malinninnissai kaammattuutigalugit. Ingasammik immap pissusaanut alaatsinaannissaat.
AAMMA ATUARUK Saqqap avannaani nuna sisoorpoq
Soorlu aamma Sullorsuami tuperluni unnuisoqassappat, sapinngisamik qatsissumi tupertoqartarnissaa Sillimaniarnermut Ataatsimiisitaliarsuarmit innersuussutigineqarnikuusoq.
AAMMA ATUARUK Qaqqanit sisoortoqarsinnaanera aarlerinaateqartoq uippallernanngilarli
