Saqqaq Qaqqanit sisoortoqarsinnaanera aarlerinaateqartoq uippallernanngilarli
![](/sites/default/files/styles/image_934x467/public/article_images/saqqaq_ny.jpg?itok=nD7VwIhC)
Sullorsuarmimi, Vaigatimi, qaqqanit ulorianartumik sisoortoqarsinnaanera annertuumik aarlerinartoqartoq, Danmarkimi Kalaallit Nunaannilu ujarassiuutut misissuiffiup, GEUS-ip, misissuinerata inernerini atuarneqarsinnaavoq:
Qaqqat ulorianartumik sisoortoqarfiusinnaasutut misissorneqartut pingaartumik Qeqertarsuarmi, Nuussuarmi, Uummannallu Kangerluani inissisimapput, uippallertoqartariaqanngitsorli, Upalungaarsimanermut ataatsimiititaliap erseqqissaatigaa.
Saqqami illuni ulinnerpaasarfiup tininnerpaasarfiullu qeqqata killiffigisartagaaniit 4 meteriinit qummut qutsitsigisup iluani sapinngisamik unnuisoqassanngitsoq, Upalungaarsimanermut ataatsimiititaliap inassutigaa.
GEUS-ip erseqqissarpaa, ornigulluni misissuinissat pisariaqartut, naammannerusumik ulorianartorsiorfiusunik naliliisoqartinnagu.
Sullorsuarmi siusinnerusukkut sisoortoqarsimanera pissutigalugu, tamaani qaqqanit annertuumik sisoortoqarsinnaanera annertuumik aarlerinartorsiorfiusoq GEUS-ip aamma nalilerpaa.
Saqqami ulinnerpaasarfiup tininnerpaasarfiullu qeqqata killiffigisartagaaniit 4 meteriinit qummut qutsitsigisup iluani marlunnik illoqarpoq, inoqutigiit pingasut taakkunani najugaqarlutik, inoqutigiillu qutsinnerusumut nuunnissaat Upalungaarsimanermut ataatsimiititaliap tassa inassutigaa.
Kommunip innuttaasut pineqartut oqaloqatigai aaqqiissutissaasinnaasunik kissaatit pillugit. Naalakkersuisut Avannaata Kommunia peqatigalugu Saqqami innuttaasunik ukioq manna januaarip ingerlanerani ataatsimiisitsiniarput.
Saqqamit ungasinngitsumi Qeqertami upalungaarsimanissamut tunngavissaqanngitsoq inassutigineqarpoq, taamaattorli Sullorsuarmi angallannermi, kisarsimanermi tupertornermilu suli mianersortoqarnissaa inassutigineqarpoq.
Nuussuup kujammut kitaata sineriaani qaqqanit annertuumik 2000-imi sisoortoqarpoq, Saqqarlu tassaarsuarmit eqqugaavoq, annertunerusumilli ajoqusertoqarani.
Karrat kangerluani qaqqanit annertuumik 2017-imi juunip ulluisa 17-ianni sisoortoqarpoq, tassaarsuaqarlunilu. Nunaqarfiit Illorsuit Nuugaatsiarlu eqqorneqarput, inuillu sisamat taamanikkut ajunaarlutik.
Nunaqarfinni taakkunani najugallit isumannaallisaaniarnerit pissutigalugit qimagussorneqarnikuupput.