Saqqap avannaani nuna sisoorpoq

Saqqap avannaani Qullissat akianni Ivisussat Qaqqaata kangiatungaani nuna ippassaani sisoorpoq. Pisorli ulorianartuunngitsoq Avannaata Kommuniani upalungaarsimanermut pisortap Amos Pjetturssonip naqissuserpaa.

Nunaqarfiup Saqqap avannaatungaani Ivisussat qaqqaanni, Nuussuarmiittumi, nuna pujortoq takuneqarsimasoq Avannaata Kommuniatalu upalungaarsimasuinut nalunaarutigineqarsimavoq. Upalungaarsimanermut pisortaq Amos Pjettursson KNR-imut taama oqarpoq. Pisorli inoqarfinnut ulorianartorsiortitsinngilaq.

- Saqqami qatserisartut ittuata oqaloqatiginerani ulorianarpallaanngitsutut nalilerparput, qaqqap nikerarnera unikkallarsimavoq. Pujorunnaarpoq, Amos Pjettursson oqarpoq.

Taamaakkaluartorli pisoqarfiup eqqaani inoqarfiit alaatsinaalluarnissaat inassutigaa.

- Kisianni inuit sillimassapput alaatsinaalluarlutik arlaannik pisoqarnissaanut, Amos Pjettursson naqissusiivoq.

Karrat kangerluanni Uummannap kangianiittumi tassaarsuaqarsinnaanera suli navianaateqartoq upalungaarsimanermut suliaqartut naqissuserpaat, tamaanngaanniilli maannakkorpiaq nalunaarutiginnittoqarsimanngitsoq Amos Pjertturssonip erseqqissaatigaa.

Nunap ilaa sullorsuarmiittoq nunaqarfiup Saqqap, Qullissallu nalaat tassaarsuaqarsinnaaneranut aarlerinartoq upalungaarsimanermut suliaqartut januaarimi saqqummiussaanni uani atuarneqarsinnaavoq.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat