Qullissani aasarsiortoqarnissaa inerteqqutigineqanngilaq

Sullorsuarmi, Vaigatimi, qaqqanit ulorianartumik sisoortoqarsinnaanera annertuumik aarlerinartoqaraluartoq Qullissani aasarsiortoqarnissaa inerteqqutigineqanngilaq.
Assi © : Ingrid Sandgreen
Allattoq Kathrine Kruse
januaarip 14-at 2019 17:36

Mianersortumilli periuseqartoqarnissaa inassutigineqarpoq, soorlu aamma Sullorsuami tuperluni unnuisoqassappat, sapinngisamik qatsissumi tupertoqartarnissaa innersuussutigineqartoq.

Tamanna Pinngortitamut, Avatangiisinut Ilisimatusarnermullu Naalakkersuisuugallartup, Erik Jensenip, Avannaata Kommuniata borgmesteriata, Palle Jeremiassenip, aamma Politimestereqarfimmit aallartitap Saqqami aamma Qeqertami innuttasunik sisamanngormat ataatsimiisitsinermi saqqummiunneqarpoq.

- Upalungaarsimanermut ataatsimiititaliarsuup inerteqqutiginngilaa, aammalu inerterissutiginagu, Qullissaniittoqartarnissaa. Kisianni aamma Qullissat sumiiffinnut aarlerinartoqarfinnut qanittumiittuuvoq. Taamaattumillu, ingammik annertuumik qaqqap ilaanik qaarsumik sisoortoqassappat - tassaarsuaqariataassappallu - annertusinnaammat qutsissumi unnuisarnissaq kaammattuutigerusunnarpoq. Namminersorlutik Oqartussani ujarassiuutut atorfilik, Jonas Petersen taama oqarpoq.

Sullorsuarmili, Vaigatimi, mianersortumik periuseqarnissaq upalungaarsimaniarneq peqqutigalugu inassutigineqarpoq, soorlu aarlerinartoqarneranik pasitsakkaanni qatsissumut pipallannissaq innersuussutigineqarluni.