Aaqqissuisuuneq: Siumut ileqqorissaanngilaq - Iluaqutaavorlu
Inatsisartut ukiaanerani ataatsimiinnerisa nalaanni Siumukkormiut ilaatigut aaqqiissutissanik makkuninnga siunnersuuteqarput, aatsitassarsiornermi misissuinernut akitsuusiisoqassasoq, taamaalilluni Nunatta karsia aningaasanik millionerpassuarnik isertitaqartilerlugu, taakkulu aningaasat ilaatigut illuliornernut atortussanngorlugit siunnersuuteqarlutik. Tassalu siunnersuutit tamakku qinersisartunik upperineqarlutik tigulluarneqartut, Sermitsiap aaqqissuisuunera, Poul Krarup oqarpoq.
- Naalakkersuisut maanna inissisimanerat imaappoq, aningaasaqarnerput appariagaatsiarsimavoq taamaattumillu sipaarutissanik nassaarniartussaallutik. Tamannalu inuiaqatigiit isaannik isigalugu iluarinanngitsuulluni. Tamannarpiarlu tunngavigalugu illuatungiliuttut imaaliallaannaq innuttaasunut neriorsuerujussuarsinnaanngorput ukiuni tulliuttuni sisamani 1,4 milliardinik koruuninik nassaarsinnaallutik. Tassalu tamanna illuatungiliuttuunertik ajunngivissumik atorluarlugu oqariartuutaat, kisiannili aappaatigut politikki eqqarsaatigalugu ileqqorissaannginneruvoq neriorsuilussinnarnerullunilu, Poul Krarup taama oqarpoq.
Siumukkut ukiuni kingullerni sukataarsimaqisut Poul Krarupimit nersualaarneqarputtaaq.
- Siumut illuatungiliuttunngormalli Inatsisartuni oqaatsit sakkortuut atorneqalerput. Tamatumunnga pissutaaneruvoq Siumup illuatungiliuttuunini nutaajusoq nassaariniartariaqaramiuk. Tunngavilersuutaat ilaatigut neqitaqanngivissortaraluartut taamaattoq Siumukkut Naalakkersuisooqatigiinnut isornartorsiuisarmata nersugassaapput. Tamannarpiarlu tunngavigalugu isumaqarpunga Siumukkut qinersinermi tullermi siuariagaatsiassasut, Poul Krarup naliivoq.
Tulliani qinersisoqartinnagu maanna Naalakkersuisuusut pitsaasunik inerniliussanik takutitsisariaqartut Poul Krarupip oqaatigaa, taamaaliunngippatami qinersinermi tullermi ajorsariaannaammata.
Inatsisartunili ilaasortat ilaat inuiaqatigiinnut oqariartuutaat allanit ersarinnerusartut Poul Krarupip oqaatigaa, ilaatigut atit makku taallugit:
- Oqallinnerni kikkut saqqumilaanerunersut nalunngilluarpagut, Aleqa Hammond, Kuupik Kleist, Maliina Abelsen, Niels Thomsen, Malik Berthelsen, Naaja Nathanielsen aamma Aqqaluaq B. Egede, tassalu taakku politikkikkut oqariartuutiminnik tunngavilersuilluartartut, Poul Kraup oqarpoq.
Taannali aammattaaq isumaqarpoq Siumukkut takorluugakippallaarlutillu siunnersuutigisartagaat ikkappallaartartut.
Taamaakkaluartoq Siumup siulittaasua, Aleqa Hammond susinnaasoruna?
- Aleqa Hammondip oqariartuutigisartagai qinersisartut upperisarpaat, naak ilaatigut ilumuunngitsunik oqariartuuteqartaraluartoq. Tamatumunnga pissutaaneruvoq siunissaq eqqartugaa uppererusunneqartarmat, Sermitsiap aaqqissuisuunera, Poul Krarup taama oqarpoq.
