Politikerinut allakkat: Aaqqiissuteqarnissamut suliniuteqarnermi peqataatitsiartigut

Imminut toquttartut amerlanerat, kinguaassiutitigut atornerluinerit, meeqqallu ikiorneqarnissaminnik pisariaqartitsisut ikiorneqanngitsut. Tassa pissutsit oqaloqatigiissutigineqarlutillu aaqqiivigineqartariaqartutut, meeqqat inuusuttuaqqqallu pillugit suliniaqatigiiffiup ilaatigut tikkuagai.

Inatsisartut kissaataat aallaavigalugu naalakkersuisut naalagaaffimmit ikiorneqarnissamik kissaateqarsimanerat suliniaqatigiiffiup nuannaarutigaa.

AAMMA ATUARUK Tillie: Periusissiaqaraluartoq imminut toqunnissamik sioorasaarisut amerlavallaarput

- Oqartussaasut suliffeqarfiutaat iliuuseqaqatigiinnissartik anguniarlugu suleqatigiinnermut isumaqatigiissutinik atsioqatigiikkajuttarput, suleqatigiinnikkulli iliuuseqarnissaraluat qatangiinnartarpoq, meeqqat inuusuttuaqqallu pillugit suliniaqatigiiffik allappoq, suliniaqatigiiffiillu taakkutut ittut iliuuseqaqatigiinnernut ilaatinneqarnissaat taakku kissaatigaat.

Meeqqat inuusuttullu pillugit suliniaqatigiiffiit assigiinngitsut meeqqat inuusuttuaqqallu pillugit suliniaqatigiiffiup ataani inissisimapput.

- Meeqqat atugarliortut sinnerlugit suliniuteqartarpugut. Meeqqat ilaqutariillu assigiinngitsunik peqquteqarlutik inuunerminni annertuunik ajornartorsiutillit sinnerlugit suliniuteqartarpugut. Illoqarfinnut nunaqarfinnullu tikeraartarpugut, tamatumanilu najukkani oqartussaasut suliffeqarfiutaat suleqatiginerisigut inuuniarnikkut ajornartorsiutit akiorniartarpavut, suliniaqatigiiffik allappoq, nangillunilu:

- Taamaattumik Danmarkimi naalakkersuisunit ikiorneqarnissamik noqqaassuteqartoqarneranut atatillugu politikerinit misilittakkatigut siunnersuutitigullu tusarniaavigineqarsimannginnerput uggoraarput.

AAMMA ATUARUK Atornerluisarneq suli ajornartorsiutaaqaaq

- Peqataatinneqarsimannginnerput isoraarput. Neriuppugut matumani allakkat ammasut oqaloqatiserineqarnissatsinnut aallarniutaajumaartut.

- Taamaattumik asasakka politikerit. Qaa, suleqatigiilluta aallartiinnariarta, meeqqat inuusuttuaqqallu pillugit suliniaqatigiiffiup politikerinut ammasumik allagaqaatini naggaserpai.

Suliniaqatigiiffimmi ilaasut tassaapput Kalaallit Røde Korsiat, Unicef aamma Meeqqat Inuunerissut.