MIO: Atornerluisarneq suli ajornartorsiutaaqaaq
Naak nunatsinni 1995-imi inunngorsimasut meeraanerminni kinguaassiutitigut kannguttaatsuliorfigineqarsimasut 1970-ikkunni inunngorsimasunut naleqqiullugit affaannaagaluartoq, kannguttaatsuliorfigisaasut suli amerlaqaat.
Nalunaarsorneqanngitsummi amerlaqisut, Meeqqat Illersuisuat erseqqissaavoq.
AAMMA ATUARUK Meeqqat atornerlunneqarnikut ikiliartortut
- Kisitsisinngornikuunngitsut, tassa nalunaarutigineqarsimanngitsut, ilisimagatsigit inuiaqatigiinni suli annertoorujussuusut, Meeqqat Illersuisuat, Aviâja Egede Lynge, oqarpoq.
Ullumi meeraasut ilanngunneqanngillat
Innuttaasut peqqissusaannik Naalagaaffiup misissuisoqarfiata nalunaarusiaa naapertorlugu 1970-ikkunni inunngorsimasut 43 procentii meeraanerminni kinguaassiutigigut kannguttaatsuliorfigineqarsimasuupput.
1995-imilu inunngortut nalunaarsorneqarnerat qimerlooraanni, ajornartorsiummut kisitsisit 20 procentimut appariarsimapput.
AAMMA ATUARUK Tarnip qupineri Uummannami saqqummersinneqalersoq
- Uanga meeqqat illersuisuattut kisitsisit uku kisiisa naatsorsuutigisinnaanngilakka. Pissutigalugu nuna tamakkingajallugu angalasimanitsinninngaanniit aammalu nalunaarusiorsimanitsinninngaanniit ilisimalluinnaqqissaaratsigu, sumulluunniit pigutta, nalunaarutigineqartartut amigaatitaqartut misissugassanik.
Kikkulluunniit eqqugaasinnaasut
Ikkatiginnittarnerni imigassaq, peqqutaaqataalluinnartutut taaneqaraluartoq, ajornartorsiummut aallaaviunerpaasutut inerniliunneqarsinnaanngitsoq, Meeqqat Illersuisuat isumaqarpoq.
- Imigassamit aallaaveqanngikkaluartunik aamma kannguttaatsuliortoqartarpoq. Ilaqutariit iluanni aamma pisarpoq ilaqutariillu avataanni, taamaammat eqqaamassavarput kikkunnulluunniit una pisinnaavoq.
AAMMA ATUARUK Atornerluisarneq pillugu Qaanaami oqalugiarneq pissarsiffiulluartoq
Kannguttaatsuliorfigineqartut ikiliartortutut saqqummiunneqarnerat sinnassaatigissanngikkipput, illersuisoq oqarpoq. Sulimi suliassaqaqaaq.
Inuit assigiinngissinnaaneri eqqumaffigineqartariaqartut
Aviâja Egede Lyngellu nuannaarutigaa Naalakkersuisut kinguaassiutitigut kannguttaatsuliortarnerit akiorniarlugit Killiliisamik taasaminnik sulinissamik periusissiormata.
AAMMA ATUARUK Kinguaassiutitigut kannguttaatsuliortarnerit suli paqumigineqarput
Kisianni nunatsinni sumiiffinni assigiinngitsuni ileqqut isiginneriaatsillu assigiinngissinnaaneri eqqaamaqquai. Pinaveersaartitsiniarlunilu suliat sumiiffinnut ataasiakkaanut tulluussarneqarnissaat neriuutigaa:
- Assersuutigalugu TV-kkut nittarsaasseqattaarnerit, soorlu meeraq kannguttaatsuliorfigineqarsimanera pillugu maanna nalunaariaatsimik saqqummiinerit, tamanut atuussinnaanngilaq. Taamaammat inuit sumiiffiillu aallaaviusariaqarput iliuutsinut iluaqutaassappata.
