Aappilattumi savimmik toqutsinermik eqqartuussineq: Ukiut arfineq pingajuat affarmi pineqaatissinneqartoq
Kujataani Aappilaattumi savilersorluni siorna aggustip 14-iani toqutsisoqarneranut ullumi eqqartuussisoqarpoq.
Angut Nanortalimmeersoq ukiunik arfineq marlunnik qaammatinilu arfinilinnik pineqaatissinneqartussanngorlugu eqqartuunneqarpoq.
Kalaallit Nunaanni politiineersoq unnerluussisoq, Martin Strandby Nielsen taama paasissutissiivoq.
Angut pineqartoq unnerluussisussaatitaasullu eqqartuussut akueraat, eqqartuussinerup kingorna angut tigummigallagassanngortinneqarpoq.
Eqqartuussineq Eqqartuussisoqarfik Kujallermi pivoq.
AAMMA ATUARUK Angummut Aappilattumi savimmik toqutsisimasutut unnerluussamut tunngasoq suliarineqalertoq
Unnerluussisussaatitaasup Martin Strandby Nielsenip eqqartuussut iluarisimaarpaa.
-Pisup ilungersunarnera sakkortuneralu eqqartuussinermi immikkut isiginiarneqarpoq, tamannalu iluarisimaarparput, taanna oqarpoq.
Toqutsisimasunut pineqaatissiineq ukiunut arfineq-marlunnut qaammatinullu arfinilinnut qanittumi Nunatta Eqqartuussivianit sivitsorneqartoq, pineqaatissiinermi aallaaviusoq taassuma oqaatigaa.
Qarasaasiatigut pinerliineq
Angut taanna angummik 35-nik ukiulimmik savimmik kapoorlugu toqutsisimasutut unnerluussaasoq, unnerluussissummi allaqqavoq.
Kapoorinermit ikit 25-iusut Martin Strandby Nielsenip oqaatigaa.
Toqutsineq Aappilattumi angerlarsimaffiit ilaanni ullaakkut nalunaaqutaq tallimat arfernullu akornanni pivoq. Pinerluttoqarsimaneranik misissuisartoq toqusunillu misissuisartoq Danmarkimeersut Aappilattumi misissueqqissaarnermi ikiuukkiartorput.
Uunnerluussaq taamanikkut 33-nik ukioqarpoq.
Angut savilersorluni toqutsisimanermi saniatigut qarasaasiatigut pinerliisimasutut aamma eqqartuunneqarpoq, taanna aningaasanik tigutsit allap pigisaa atorlugu aningaasanik Nanortalimmi Pilersuisumi 2019-imi tigusisarsimavoq.
Ilaatigut qoorortuumik Stevensimik nipikillisaatilimmik qinnutilimmillu qoorortuumullu kaliber 22-mut imassanik 50-inik aningaasat pisiniutigisimallugit.
