Aasiaat: Aappariit meerartallit ujarneqartut
Kalaallit Nunaanni Politiit aamma Issittumi Sakkutooqarfik umiarsuaq alapernaarsuut Lauge Koch ikiortigalugu aappariit 30-it sinnilaarlugit ukiullit, angut 33-nik ukiulik arnarlu 31-nik ukiulik, ernerallu marlunnik ukiulik, Aasianniit Niaqornaarsuliarlutik umiatsiaaqqamik pingasunngornermi ullup qeqqata missaani aallarsimasut ujarpaat.
Aappariit politiit pigaartui naapertorlugit umiatsiaaqqamik ammaannartumik, Tuukkaq 500-mik imaluunniit Tuukkaq 505-imik Marinerinik 50 hk-inik aquuteralalimmik angallateqarlutik aallarsimapput.
Unnuaq tamaat ujaasisoqartoq
- Lauge Koch unnuaq tamaat ujaasivoq, kisianni isikkivilussimavoq. Timmisartoq qulimiguulik aamma ujaasiartortinneqarluni Aasiaat tungaannukarpoq, politiit pigaartuisa pisortaat, Aqqaluk Petersen, KNR-imut oqarpoq.
Politiit aappariit ernerallu maqaasineqartut pillugit pingasunngornermi unnukkut qulingiluap missaani kalerrinneqarput. Tamatuma kingorna Issittumi Sakkutooqarfik peqatigalugu umiarsuaq alapernaarsuut Lauge Koch Niaqornaarsuup tungaanut nunap iluatigut ingerlaarfiusartuni ujaasitinneqarpoq.
Aqqaluk Petersenip ilanngullugu ilisimatitsissutigivaa umiatsiat angisuut marluk aappariinnut ernerannullu ujaasinermut maanna ikiuutilersimasut.
Politiet aamma pingasunngormat unnukkut Pan Pan-imik kalerrisaaripput angalasut allat umiatsiaaqqamik qinaaseqquneqarlutik.
