Aappaagumut aningaasaqarneq Inatsisartut ataatsimiititaliaat avaqqutiinnarlugu akuersissutigineqartoq
Aappaagumut utaqqiisaasumik aningaasanut inatsisaagallartussap allanngortinnissaata saniatigut Kommunini aappaagu milliunilippassuarnik nalimmassaanissaq Naalakkersuisooqatigiilersut Inatsisartunit iperarneqarnissaa piumasaraat.
- Ullumikkut aningaasatigut inissisimanerput eqqarsaatigalugu utaqqiisaagallartumik aningaasanut inatsisiliornissaq ajorinngilara. Taamaallaat taassumunnga tunngatillugu akuerinngilara isumaa tunngatillugu aningaasartuutissanik ilaseqqinnissamik allannguutitut siunnersuutit. Nutaanimmi ilassutissalersornani aningaasanut inatsisaareersoq nangeqqiinnagassaagaluarmat, illuatungiliuttuniit Inuit Ataqatigiinneersoq Naaja Nathanielsen oqarpoq.
Aningaasanut inatsit 2015-nimoortoq suliarinissaata tungaanut utaqqiissaasumik aningaasaliissutissanut inatsisaagallartoq Inatsisartut ullumi juullimut sulinngiffeqarallarnissaq sioqqullugu suliaraat. Siullermeerneqarmallu Naalakkersuisooqatigiit sukkasuumik naammaseqqullugu ataatsimiitsitalianut ingerlateqqinneqassanngitsoq aalajangiuppaat.
Illuatungiliuttulli Inuit Ataqatigiit Partii Nalerarlu siunnersuummut akerlioqisut Naalakkersuisooqatigiinnut annertuumik isornartorsiuipput.
AAMMA ATUARUK Paasissutissat Aappaagumut aningaasanut inatsisaagallartussaq atuaruk
Naak Naalakkersuisooqataasut illersuigaluartut illuatungiliuttut Nunatta aningaasaqarnerata inissisimanera akerliunermut tunngavilersuutigineqarpoq:
- Ajorpallaarpoq aningaasaqarnermut ataatsimiitsitaliap nunatta aningaasatigut inissisimanera qanoq innersoq ilisimanagu aalajangissasut. Suli ataatsimiissimannginnatta siunnersuutaagallartumut attuumassuteqartussanik aningaasanik ilassutissanik qinnuteqartoqarsimanersoq ilisimanngilarput.
Inatsisartuni eqqartorneqarsimanngitsoq 3 million koruuninik aningaasartuutaanerusussatut utaqqiisaasumik aningaasanut inatsisissami ilanngunneqarsimasumut Inuit Atataqitigiit akerliunertik ersersillugu peerneqarnissaa angorusullufu, allannguutissatut siunnersuummik saqqummiussigaluarput. Siunnersuulli akuerineqanngilaq.