Paasissutissat Aappaagumut aningaasanut inatsisaagallartussaq atuaruk

Kalaallit Nunaanni ingerlatsineq ukiup tullissaanut ingerlaqqinniassammat, nalinginnaasumik ukiut tamaasa aningaasanut inatsit isumaqatigiinniutigineqartarpoq.

Ukiormanna qinersisoqarnera pillugu allatut isikkoqarpoq, Inatsisartut tulliani nalinginnaasumik ataatsimiinnissaanni aatsaat isumaqatigiinniarnerit aallartissapput tamannalu februaarip marsilluunniit qaammataani pissalluni.

Taamaakkaluartoq sanaartornermik suliallit allallu ernumassutissaqanngillat. Aningaasanut inatsit 2015-nimoortoq suliarinissaata tungaanut  utaqqiissaasumik aningaasaliissutissanut inatsisaagallartoq, nunatsinni ingerlatsineq pisariaqartoq, Inatsisartut ullumi juullimut sulinngiffeqarallarnissaq sioqqullugu suliarissavaat.

Sanaartornermut pilersaarutit 319 million koruuninut qaffanneqarnissaat siunnersuutaavoq, tassanilu pisortat inissiaataasa suliarineqarnissaannik aammalu suliaareersut pilersaarutaasullu aningaasanut inatsisigigallagassami allannguutissami tunngavilersuutigineqarput.

Peqqinnissaqarfimmi nutaamik napparsimasunut nalunaarsuisoqartalernissaanut sivisuumik pilersaarutaasimapput, tassungalu millionerpassuarnik immikkoortitsisoqarpoq, aammattaaq assartuinermut ataatsimiitsitaliarsuup misissueqqinnissaannut 5 10 million koruuninik immikkoortitsisoqassaaq.

Kalaallit Nunaata Radioa KNR nutaamik illutaarnissaa pilersaarusiorneqartoq 50 million koruuninik immikkoortitsiffigineqarpoq.

Aasianni utoqqaat illutaarnissaq, Maniitsumi Sisimiunilu utoqqarnut angerlarsimaffiliornissat 2015-mut pilersaarutaasut ilagaat. Narsami meeqqat atuarfissaat utaqqineqarsimaqisoq aningaasaliiffigineqassaaq soorluttaaq Sarfannnguani atuarfimmik alliliinissaq.  

Ilulissani perorsaanermik ilinniarfiup allilerneqarneranut suliaq ingerlaannassaaq ukiullu tullianut aningaasaliissutissanut 40 million koruuninik ilanngaassaaq. Taamatuttaaq Qaqortumi Campus kujallermi sanaartortoqarnissaa aningaasartuutaanissaa pilersaarutaavoq.

Taakkuali saniatigut Nuummi Kujallerpaani kollegialiornissa, Maniitsumi Sisimiunilu innarluutilinnut illuliortiternissaq aningaasaliiffigineqassanersut Inatsisartut aalajangiiffigisassaraat.

Tasiilami Nuummilu aappagu illuliortiternissat marluk 9 million koruuninik aamma 13 million koruuninik akeqartussat aningaasalerneqassapput. Aningaasallu amerlaqataanik akillit Aasianni inissiat aqqaneq marluk suliarineqartut ingerlateqqinnissaanut immikkoortitsisoqassaaq, soorluttaaq Qaanaami inissiat arfineq pingasut pilersikkiartuaarneqartut.