Aangajaarniutit pillugit katsorsartittut amerliartuinnavittut
Allorfik imigassamik, hashimik aningaasanoornermilluunniit ajornartorsiuteqartunut katsorsaaviuvoq.
Allorfiup 2016-imi ammarneraniit katsorsartittut marloriaataanik amerlanerupput, taakkulu amerliartuinnavissimapput.
Allorfiup ukiumoortumik nalunaarusiaata takutippaa katsorsartinnermik aallartitsisunit 725-nit 667-it katsorsartinnerminnik naammassinnissimasut, tassa imaappoq katsorsartilersut 92 procentiisa katsorsartinnertik naammassisimavaat.
2019-imit 2020-mut katsorsartittartut amerlassusaat 33-nik amerleriarput.
- Katsorsartinnissamik kissaateqartut taama amerlatigineri nuannaarutigaarput. Oqariartuutiginiarparput: Tikilluaqqusaavusi. Katsorsartinneq akeqanngilaq. Aanngajaarniutinik aningaasanoornermillu ajornartorsiuteqartut siusinaartumik katsorsarneqartarnissaat kissaatigaarput. Katsorsartittartut 40 procentiinnaat ukiut tallimat ikinnerusuniluunniit ajornartorsiuteqarsimasuusarput, Allorfimmi pisortaq, nakorsaq, Birgit Niclasen oqarpoq.
Imigassamik suli atornerluisoqarnerpaasoq
Katsorsartittuni imigassaq aangajaarniutini suli ajornartorsiutaanerpaavoq, hashimik atornerluineq tulliulluni, kiisalu aningaasanoornermik atornerluisut katsorsartittut 10 procenteralugit.
- Allorfimmi katsorsaasarneq coronap nalaani akimmisaartinnerpoq. Sulisutsinnik sinerissamiittunik ilinniartitseqqittarneq ukioq ataaseq sinnerlugu kinguaattooqqavoq. Pingaartumik immikkut eqqugaapput meeqqanut inuusuttunullu katsorsaanissamik neqeroorutigisassagut. Maannali Allorfinni sulisutta ilinniartinneqarnissaat ukiaru aallartissasoq neriuutigaarput, Birgit Niclasen oqarpoq.
Ikioqqusuni arnat angutinit amerlanerusut
Aangajaarniutinik atornerluinermut katsorsartinniartut 25-nit 34-nut ukioqartuunerusut, taakkunanilu arnat angutinit amerlanerusut, 2020-mut ukiumoortumik nalunaarusiami takuneqarsinnaavoq.
Katsorsatittut affaat sinnilaarlugit katsorsartereernikuusimapput. Tamanna qaqutigoortuunngilaq, ukiunimi siuliini aamma taamaassimavoq.
- Naatsorsuutigereerparput. Oqariartuutigaarput: Katsorsartinninni ilikkagaqarputit piareeruit katsorsartinnissannut ikiortissarsioqqissinnaavutit. Qujanartumilli amerlasuut aanngajaarniutinik atuiunnaarnissamik piumassuseqarlutik upperinninnerminnillu takutitsisartut naapittarpagut, Birgit Niclasen oqarpoq.
