Aalisartut tapiiffigineqarsinnaapput
Atassutip Inatsisartuni ilaasortaatitaasa ujartorpaat ESU-mut eqqaanartumik aalisartunut tapiisarnissamik eqqarsaateqartoqarnersoq. 2012-mulli aningaasanut inatsit tunngavigalugu ukiunut sisamanut tullernut aningaasaliisoqarpoq nutaanik angallatitaarniartunut aamma aalisartinut atorunnaartussanut tapiissutigineqartussanik.
- Aningaasaliissutit taakku sinerissap qanittuani aalisartunut periarfissiipput angallammik nutaamik pisinerminni akiata 40procentia tikillugu tapiissutisisinnaanissaannut, Aalisarnermut Naalakkersuisoq Ane Hansen Atassummeersut Sivert K. Heilmannip aamma Knud Kristiansenip paragraf 37 tunngavigalugu apeqquteqaataannut akissummini allappoq.
Taakku aamma paaserusuppaat sooq aalisartut 60-leereersimasut umiatsiaarartaarnissamut tapiiffigineqarsinnaannginnersut.
- Naalakkersuisut aalisartutoqarsuarnut 60-inik qaqisilaarsimasunut inuussutissarsiutigalugu umiatsiaaqqamut tapiissutinik tunisisinnaanngillat, Ane Hansen oqarpoq Inatsisartullu 2006-mi aalajangernerat innersuullugu.
Taamanikkut Inatsisartut aalajangerput aalisartut 18-it 60-illu akornanni ukiullit kisimik landskarsimiit tapiiffigineqarsinnaasut. Inatsisartulli oqaluuserissamaarpaat aalisartut utoqqaanerusut akiitsuinik isumakkeerfigineqassanersut. Taanna oqallinneq Inatsisartut ukiaaneranik katersorneranni pisussatut naatsorsuutigineqarpoq.
