VIDEO Aalisartut siulittaasuat akitsuusersuiniarnermik iluarisimaarinninngilaq
Akitsuutit allanngortinneqaraluartut suli sipaarniartoqassaaq. Allannguisoqaraluarmalli nunatta karsia aappaagumut 65 millionit koruuninik amigartooruteqartussatut suli naatsorsuutigineqarpoq.
Amigartooruteqarnissaq ilimagineqareeraluartoq taamaattoq nunatta pisuussutai isumalluutaalluarput.
Raajat pisarineqartussat amerlineri 42 millionit koruuninik isertitsissutaassapput.
Qalerallillu suliareqqinneqanngitsut avammut annissukkat akitsuusersornerisigut 20 millionit koruuninik isertitsissutiginiarneqarput.
Aamma atuaruk Naalakkersuisut akitsuusersuiniarnertik annikillisippaat
Aalisartut siulittaasuat iluarisimaarinninngilaq.
- Politikkikkut aamma sinerissami qanittumi aalisarnerup qineqqusaarutigineqarneranut naapertuutinngilluinnarpoq. Uggornarporlu taamatut massakkut naalakkersuinikkut aamma ingerlatsisoqalernera, KNAPK-mi siulittaasoq, Henrik Sandgreen KNR-imut oqarpoq
Siunnersuummimi, qalerallit aggorneqanngitsut avammut tunineqarnissaanni akitsuusersuinissaq pineqassappat, piviusorsiorsorineqanngilaq.
- Uanga piviusorsiortutut oqaatigisinnaanngilara, tassami uani ilimagisariaqarparput taamatut iliorneq aamma illuatungaani kingunerlussinnaammat, KNAPK-p siulittaasua oqarpoq.
Aamma atuaruk IA-p isumaqatigiissutaagallartoq isumaqatigingajappaa
Tunitsiviimmi akitsuusersugassanik tiguserusussanersut nalunarpoq.
- Akitsuusersorneqartussanik taakkunannga tunisassiorfiit ilumut tunisassiorusussanersut imaluunniit taamatut isikkulinnik tingooraarusussanersut matumani nipilersoqataasussaavoq, Henrik Sandgreen oqarpoq.
Akitsuusersuinissallu iluatsinnissaa qularnarpoq.
- Uanga qularilluinnaqqissaarpara 20 milliuuninik isertitsissutigineqarnissaa taamaaliinnarlugu, KNAPK-mi siulittaasoq, Henrik Sangreen oqarpoq.
Illuatungaanili, aalisartut siulittaasuata, raajat aningaasanik amerlanernik isertitsissutigineqarnissaa piviusorsiortuunerarpaa. Taakkumi akitsuutaat nikisinneqassanngillat.
- Piusut taakkua taamatut ingerlareerput taavalu pisassat annertusineqarnerani soorunami amerlanerusut aalisarneqarpata aamma isertitsissutigineqartussaavoq, KNAPK-p siulittaasua oqarpoq.
Aamma atuaruk Pisortat sullissineranni millionerpassuarnik sipaarniuteqalersut
Taamaattoq aalisagaq naleqarluartoq aallerfiginiarneqalernerani, susassaqartut attavigineqaqqaartariaqarsorineqarput.
- Pittaanerusunik aaqqiissuteqartoqarsinnaaneranik innersuussuteqartoqarsinnaagaluarpoq. Kisianni isumaqarpunga matumani suleqatigiinneq ungasippallaartoq susassaqartut pisortallu akornanni, Henrik Sandgreen oqarpoq.
