Aalisartut kattuffiat: Sinerissap qanittuani qaleralittassiissutit amerlanerusariaqarput
Aalisarneq pillugu ataatsimiititaliarsuaq Qeqertarsuup Tunuani, Uummannami Upernavimmilu sinerissap qanittuani qaleralinniarneq pillugu sakkortuumik isornartorsiuivoq.
Sumiiffinni taakkunani aalisartut paggallutik qaleralinniarput. Taamannallu ingerlaannassappata 2026-imi ajalusoorluni inuussutissarsiutaasinnaajunnaassasoq ataatsimiititaliarsuaq inerniliussaqarpoq.
Taama inerniliineq aalisarneq pillugu ataatsimiititaliarsuarmi ilaasortap aamma Sinerissap Qanittuani Aalisartut Piniartullu Kattuffianni pisortap upperinngilaa.
Qaleralittassiissutillu uumasorsiuut siunnersuutaannit marloriaatingajammik ukiuni kingullerni amerlassuseqartartut suli amerlanerusariaqarsorai.
- Pisassat taama ikitsigitillugit aalisartunut naleqqutinngillat. Taavalu aalisartut ullumikkut amerlassusaat eqqarsaatigalugu naammattumik pissarsissappata pisassiissutit ilaneqartariaqarput, Erik Lange KNR-mut oqarpoq.
Lange: Inuusuttuullungali ajalusoornissamik oqaluttoqarpoq
Sinerissap qanittuani aalisartut kattuffiani pisortap inuusuttuunerminit aalisarnerup ajalusoornissaa siulittuutigineqartoq tusartuartaramiuk ullumi upperiunnaarsimavaa.
- Kisianni ulloq ullumikkut taamatut ingerlasoqanngilaq. Taamatut oqaluttunik tusaajuaraluarluta kaaviiaartitat aalisakkallu ullumikkut suli qaffakkiartorput.
Agguaqatigiisillugu isertitat allaat ima ikitsigilersinnaanerat 2026-imi imminut akilersinnaajunnaartutut ataatsimiititaliarsuup nalilerpaa. Ernumananngila?
- Tassami ullut tamaasa aalisarnermik malinnaanngikkaanni aammalu aalisarfinnik aalisarfiillu qanoq ittuunerannik ilisimasaqangikkaanni ernumanarsinnaavoq. Kisianni ullut tamaasa najugaralugit inuussutissarsiutigalugillu aamma isuma allaaneruvoq, Erik Lange oqarpoq.
AAMMA ATUARUK Aalisarnermut ataatsimiititaliarsuup aalisartukinnerunissaa innersuussutigaa: Meeqqatsinnut ernuttatsinnullu naammassapput
Pinngortitaleriffimmit naatsorsukkat naapertorlugit sumiiffimmi 47-tut taaneqartartumi, tassa Qeqertarsuup Tunuani, Uummannami Upernavimmilu qalerallit agguaqatigiissillugit angissusaat oqimaassusaallu tulaanneqarnerminni 2010-mit 2019-mut millipput.
Qeqertarsuup Tunuani millinerpaallutik agguaqatigiissillugu 2010-imi 57,3 centimeteriusut 2019-imi 50,9 centimeterinngorput. Uummannani ukiuni taakkunani agguaqatigiisillugu 60,6 centimeterimit 57,9 centimenterinngorput. Upernavimmi aamma millipput, sumiiffinniilli allanit milliartunnginnerupput. Taakkua 61,3 centimerimiit 59,4 centimeterinngorput.