Aalisartut: Finn Karlsen pisuuvoq
Aalisarnermut naalakkersuisoq Finn Karlsenip qaleralinnik tunisassiortut oqaatigisaannut isumaqataavoq, taakku oqartarmata qalerallit Ilulissat eqqannguanni ukiuni kingullerni pisarineqartartut milliartuinnartut.
- Qalerallit Ilulissat eqqaanni aalisarneqartartut milliartuinnarneri assut eqqarsarnartoqartitsivoq, taama Aalisarnermut, Piniarnermut Naalakkersuisoq, Finn Karlsen septemberip naanerani oqarpoq.
Sinerissap Qanittuani Aalisartut Piniartullu Kattuffiat (S.Q.A.P.K) qalerallit pisarineqartartut milliartorneranik oqariartuuteqarneq akerlilerneqarpoq. Hans Lars Siegstad S.Q.A.P.K’mi siulittaasoq tusagassiutinut allappoq qalerallit pisarineqartartut milliartornerannut Finn Karlseni pisuusoq.
Finn Karlsen 2007-imi Atassummiikkallarami aalisarnermut naalakkersuisuunermini qalerallit tunisassiorfiit tigusinnaasaat 56 centimeterimiit 45 centimeterimut appartinnikuugai, tamannalu qalerallit pisarineqartartut millinerannut pissutaasoq, Hans Lars Siegstad isumaqarpoq.
- Ullumikkut qalerallit milliartorneranik oqalunneq Aalisarnermut naalakkersuisup namminerpiaq aallaqqaataaniit suliaraa, ullumikkullu aalisartunut pisuutitsiniutaanera kukkusuuvoq unitsinneqartariaqartorlu, Hans Lars Siegstad allappoq.
Taassuma oqaatigaa qalerallit angissusaat aallaavigalugit akit aaliangigaanngitsut, tassa kilomut akiliisoqartarmat, taamaammallu aalisartunut angissutsit apeqqutaanngitsut.
- Ullumikkut Ullumikkut nalunngilarput tunisassiorfiit imaluunniit aalisakkanik tigooraaviit aalisartunut akiliutaat angissutsit avillugit inissisimanngitsut, akeq ataaseq atorneqarmat. Taamaalilluni aalisartut soorunami pisaqalertonarnerusumi aalisartarput angissuseq apeqqutaatinnagu aki ataaseq atorneqarmat, tamaasillunilu qalerallit 500 grami 1,2 kilollu akornanniittut amerlaqisut pisarineqartarlutik mikisut angisuullu piniarnissaat aalisartunut apeqqutaanngimmat, Hans Lars Siegstad allappoq.
