Aalisartut aalisarnermut akuersissutaat arsaarinnissutigisalerniaraat

Aalisarnermut, Piniarnermut Nunalerinermullu Naalakkersuisup, Ane Hansenip siunnersuutaa taamaattoq, Inatsisartuni pingajussaaneerlugu ullumi oqallisigineqartoq amerlanerussuteqartunit akuersissutigineqarpoq.

Illuatungiliuttunilli isumaqataaffigineqarani nikussaartsitsivoq.

- 1.500 koruuneertarneq siunnersuutigineqaqqaarmalli akerleriuartarsimavarput, tassami Siumumit isumaqarpugut akileeqqaarnani aalisartoqartassasoq, Siumumit Karl Lyberth taama tunngavilersuivoq.

Umiatsiaararsorlutik aalisartut aalisarsinnaanermut akuersissummik akileeqqaartarnissaat 2009-mi atuutilersinneqarpoq. Inatsisartunili, ullumi amerlanerussuteqartunit akuersissutigineqartumi ilanngunneqarpoq, akuersissummik akiliisimanngitsut aalisarsinnaanerannik arsaagaasarnissaat. Tamannaannaanngilarli. Akiliisimanngitsut akiligassinneqarneranni akilersimanngisat ernialerlugit akiligassanngortinneqartarnissaat aamma siunersuutaavoq akuerineqarlunilu.

Aalisarnermut Naalakkersuisoq, Ane Hansen ima oqarpoq:

- Atuisut akiliisittalernissaannik siunertaq Naalakkersuisuusimasut uagullu maanna Naalakkersuisuusut isumaqatigigatsigut sulissutigeqqipparput, tassalu tamanna ullumi piviusunngorpoq, Ane Hansen oqarpoq.

Umiatsiaararsortut akiliisinnaajunaartut pillugit siunnersuut, Inatsisartuni illuatungiliuttunit, Siumukkunit aamma Atassummit isumaqatigineqanngilluinnarpoq, taakku oqarput, aalisartut aalisarniarunik immikkut akiliuteqartariaqanngikkaluartut, Karl Lyberth ima oqarpoq:

- Aalisartoq kinaluunniit 1.500 koruuninut akissaqanngitsoq soorunami eqqumiigineqarsinnaavoq. Taamaakkaluartoq Siumumit isumaqartuarpugut, kinaluunniit aalisartoq inuussutissarsiutiminik ingerlatsissaguni 1.500 koruuninik akileeqqaarnissaa pissusissamisoortutut isiginnginnatsigut, Karl Lyberth oqarpoq.

Umiatsiaararsorlutik aalisartut, Nunarput tamaat ataatsimut isigalugu 100-it missaanniittut, 2011-mi akiliisinnaajunnaarsimapput.

Taakku qanoq ikorserneqarsinnaanerat pillugu, Aalisarnermut Naalakkersuisoq, Ane Hansenip ima oqarpoq:

- Kommuni tamatumunnga suleqatigineqarsinnaavoq imalluunniit aalisarnermik inuussutissarsiuteqarsinnaajunnaartoq kaammattorneqarsinnaavoq nunami inuussutissarsiutinut nuussinnaanera. Aamma ilinniartitseqqiineq atorluarneqakutsoorsinnaavoq, taama Aalisarnermut, Piniarnermut Nunalerinermullu Naalakkersuisoq, Ane Hansen siunnersuuteqarpoq.