Aalisartunut piniartunullu siunnersuisarfik nuukkusukkaat
KNAPK-mi siunnersuisarfimmut Namminersorlutik Oqartussat ukiumut 2,4 millioner koruuninik aningaasaliisarpoq. Aningaasanulli inatsisissatut siunnersuut akuerineqassappat, tamanna unitsinneqarsinnaavoq.
- Piffissami matumani sipaarniarfiusumi koruunit tamaviisa atorluarniartavut, neriuppugullu siunnersuisarfiup Namminersorlutik Oqartussanut nuunneratigut sipaaruteqarnerulaassalluta, aalisarnermut piniarnermut nunalerinermullu naalakkersuisoq, Karl-Kristian Kruse Sermitsiamut oqarpoq.
Siunnersuulli Inatsisartunit taperserneqassanersoq aamma Nunatta karsia qanoq sipaaruteqartigissanersoq, Karl-Kristian Krusep ilisimaqqissaanngilaa.
Siunnersuut KNAPK-mit qularnartoqartinneqarpoq.
- Aalisartut atallaalerlutik kummersualerlutillu uagutsinnukartarneq sungiusimavaat. Takorlooruminaatsippara "Fort Knox"-imi taama akimarpasitsigisumi taamatut atisaqarlutik isersinnaatitaassasut, KNAPK-p pisortaa, Petrus Biilmann Sermitsiamut oqarpoq.