Aalisartoq: Qaleralinnut akitsuummut 1,5 millionit koruunit akiliutigereerpakka
Haansi Ortu Sandgreen 32-nik ukioqarpoq, angallatillu naalagaatut ilinniarsimalluni. Ilulissani marlunnik 15 meterimik 8 meterimillu takitigisunik angallateqarpoq, taakkua tamarmik qaleralinniutaapput. Katillugillu arfineq-marlunnik inuttaqarpoq.
Qaleralinnut akitsuutip 2017-imi atulerneranit akiliutigisimasani naatsorsoramigit allanut atorsinnaasimagaluarlugit oqarpoq.
- Oqarsinnaavunga taamanikkut atuutilerneraniit 1.5 millionit koruunit sinnerlugilluunniit maannakkumut akiliutigereersimalerpakka. Taakkualu aningaasarpassuupput angallatip aserfallatsaalinissaanut imaluunniit ineriartortitsinissamut atorsimasinnaasaraluakka, Haansi Ortu Sandgreen KNR-mut oqarpoq.
Inatsisartunut ukioq qineqqusaarnermi maanna naalakkersuisuutitaqartuni partiip anginerpaap, Inuit Ataqatigiit, akitsuutip peerneqarnissaa qineqqusaarutigaa.
AAMMA ATUARUK KNAPK om hellefiskeafgift: Stemmefiskeri
- Taamaammat Inuit Ataqatigiinnit oqarpugut, siunissaq unammillernartunik pisussaaffiliimmat, aalisakkanut akitsuut, tassa qaleralinnut akitsuut sinerissap qanittuani atorunnaarsissavarput. Aalisartut kaasarfimminni piareersimasuuteqarnissaat taamanikkussamut qulakkeerusukkatsigu, aalisarnermut maanna naalakkersuisoq, Aqqaluaq B. Egede Ilulissani ukioq qineqqusaarnermini taama oqarpoq.
Missingersuutinit peerneqanngitsoq
Naalakkersuisulli aningaasanut aappaagumut inatsisissatut siunnersuutaanni sinerissap qanittuani qaleralinnianut akitsuut peerneqassanngitsoq ersippoq, tassalu nunatta karsianut ukiuni tullerni sisamani ukiumut 16 millionit koruuninik iluanaarutaasussatut missingersorneqarpoq.
Maanna aalisarnermut naalakkersuisup qineqqusaarnermi ersarilluinnartumik toqqaannartumillu neriorsuinera aalisartumit neriulluarfigineqarsimagaluarpoq.
- Soorunami pitsanngoriaatissat pillugit aalisartorpassuit immaqalu aalisartorpassuit ilaqutaat qinersivugut. Tamanna soorunami uggornarpoq.
- Kisianni aningaasanut inatsisissatut siunnersuummi saqqummiunneqartut tusaallugit oqaasiinnaasut sunaaffa, qineqqusaarutaannaasimasut aalisartorpassuit, uanga ajoraluartumik taamannak nalilertariaqarpara.
AAMMA ATUARUK Asii Chemnitz om afskaffelse af afgift: Vi venter på Fiskerikommissionen
Aningaasaqarnermut naalakkersuisoq, Asii Chemnitz Narup aalisarnermut ataatsimiititaliarsuup isummernissaa utaqqeqqaarusullugu KNR-mut allappoq.
Ataatsimiititaliarsuaq suliaminik qaammatip tulliata naanerani saqqummiussissaaq.
Haansi Ortu Sandgreenili Naalakkersuisut siuliisa maannalu Naalakkersuisut ataatsimiititaliarsuaq utoqqatsissutigivallaaraat isumaqarpoq.
