Aalisarnerup aaqqissuussaanera allannguuteqassasoq
Aalisarnerup iluani nutarterineq aningaasarpassuarneq naleqassasoq qularnanngilaq. Aamma aalisarnermik suliaqartut nutarterinermi qanoq pilliuteqassanersut ersinngilaq.
Imartatta aalisagaqassusia paasiniarluarniarlugu Pinngortitaleriffimmut aningaasaliissutit amerlineqassasut, Naalakkersuisooqatigiinnissamut isumaqatigiissummi allaqqavoq.
Naalakkersuisooqatigiilertussat aalisagaqassuseq misissorluarniarlugu Pinngortitaleriffimmut aningaasanut inatsisikkut aningaasaliissutit amerliniarpaat, tassungalu atatillugu Pinngortitaleriffik piumaffigineqassaaq aalisarnermik inuussutissarsiuteqartut suleqatigineqassasut.
Aalisakkat nutaat
Aalisakkat nalituunngorsarneqarlutillu sapinngisamik Nunatsinni tunisassiarineqartalissapput, tamannalu Nunatsinnut tulaassinissamik pisussaaffiliinikkut Nunatsinnullu tulaassinngitsunut akitsuusersuinikkut pissasoq Naalakkersuisooqatigiinnissamut isumaqatigiissummi allaqqavoq.
Aalisakkat tunisassiarineqarsinnaasut nutaat atorluarniarneqassapput, aammalu aalisarfiusinnaasuni nutaani misileraatitsilluni aalisartoqassaaq. Taakkunani pisat Nunatsinnut tulaanneqarlutillu suliarineqarnissaat aqqutissiuunneqassasoq Naalakkersuisooqatigiilersussat aamma isumaqatigiipput. Isumaqatigiissummili imaaliallaannaq takuneqarsinnaanngilaq, taamaaliornemi aningaasartuutaajumaartussaat sumit matussuerneqarumaarnersut.
Allannguutit
Aalisarnissamut akuersissutillit kisimik pisassiissutinik tuniniaasinnaalerlutillu pisisinnaalissasut Naalakkersuisooqatigiilersussat aamma atsioqatigiissutigaat.
Naalakkersuisooqatigiilersussat aalisartut aalisariutiminnik nutarterinissaannut periarfissaat eqaallisarniarpaat. Tassani siunertarineqarpoq aalisartut aalisarnissamut akuersissutitik annaanngikkaluarlugit angallatitoqqaminnik taarsiisinnaanissaat. Sinerissat qanittuani aalisariutit taamaalillutik amerlissanersut, isumaqatigiissummi sukumiinerusumik allaaserineqanngilaq.
Aningaasat sumit aaneqassasut allassimanngitsut
Aammattaaq aalisariutinik nutarterineq sukkanerusumik pisinnaaqqullugu inatsisitigut periarfissat eqaallisarneqassasut oqariartuutigineqarpoq. Aalisariutinilli nutarterinermi pisortat aningaasaleeqataassanersut toqqaannartumik allaaserineqanngilaq.
Tasiilap eqqaani Ittoqqortoormiunilu aalisarneq immikkut ittumik siuarsarneqassaaq, aalisarnikkut tunitsiveqarnikkullu ineriartortitsinikkut. Taamatut inerisaaneq aningaasaliiffigineqassanersoq oqaatigineqanngilaq.
