Aalisarnermut inatsisissatut siunnersuutip kinguartinneqarnissaa KNAPK-p aamma kissaatigigaa

Aalisarnermik suliallit aalisarnemut inatsisissaq pillugu oqaloqatigineqartarniartut, siornali siunnersuutip pingaarnersai aalajangiusimaneqassasut, aalisarnermut naalakkersuisup, Erik Jensenip, siusinnerusukkut nalunaarutigaa.

Inatsisissatut siunnersuut ukiakkut ataatsimiinnissami oqaluuserisassanngortinneqarumaartoq aalisarnermut naalakkersuisoq, Erik Jensen, KNAPK-mut Sulisitsisullu peqatigiiffiannut oqarsimasoq KNAPK-p Sulisitsisullu ilisimatitsissutigaat.

Tamannali aalisartut piniartullu kattuffiata, KNAPK-p, isumatsialaasorinngilaa, aalisarnermullu inatsisissap inatsisartunit oqallisigineqarnissaata kinguartinneqarnissaa kaammattuutigalugu.

AAMMA ATUARUK Erik Jensen imminut assortorpoq

- Soorlu una inatsisissatut akuerineqartoq takorloorutsigu, taava kingunissai iluamik ilisimaneqannginnamik. Kisitsisoqartariaqarpoq, naatsorsuinerit ingerlattariaqarput, taava imatut aalajangeraanni kingunissai suussasut ilisimaneqaleqqaartariaqarmata, KNAPK-p pisortaa, Tønnes "Kaka" Berthelsen oqarpoq.

Nittartagaq: Aalisarnermut inatsisissatut siunnersuut siulittaasoqarfimmit itigartinneqartoq

Siunnersuut Inatsisartut ukiakkut ataatsimiinnissaanni oqaluuserisassanut allattorsimaffimmiinngilaq, Naalakkersuisulli Inatsisartut siulittaasoqarfiannit akuerineqassagunik kingusinnerusukkut nalunaarlutik ukiakkut ataatsimiinnermi oqaluuserisassanngortitsisinnaapput.

Aalisarnermut inatsisissatut siunnersuutip ukiakkut ataatsimiinnermi oqaluuserisassanngortinnissaa Inatsisartut siulittaasoqarfiannit itigartinneqarsimasoq nittartagaq Sermitsiaq.AG marlunngornermi ullaakkut allaaserisaqarpoq.

Inatsisartulli siulittaasuat, Hans Enoksen, naapertorlugu, Naalakkersuisut siunnersuutertik siulittaasoqarfimmut suli tunniutinngilaat.

- Siunnersuut tunniunneqarpat siulittaasoqarfimmi oqaluuseriumaarparput, Hans Enoksen KNR-imut oqarpoq.

Aalisarnermut naalakkersuisup, Erik Jensenip isornartorsiutinut akissuteqarnissaa KNR-ip sulissutigaa.