Aalisarnermut ataatsimiititaliami siulittaasoq isornartorsiorneqarpoq
-Isumaqarpunga pissusissamisoortoq, Inatsisartut Aalisarnermut ataatsimiititaliaat sulinerminni paasiniaassasut, susassaqartunillu tamanik oqaloqatiginnissaasut, Inatsisrtuni ilaasortaasugut suliaqarsinnaanerput aallaavigalugu sapinngisarput tamaat aaqqiiniarluta suleqataarusukkatta, Siumut siulittaasuat Aleqa Hammond isornartorsiuinermini oqarpoq. Taanna isumaqarpoq, Aalisarnermut Ataatsimiititaliami siulittaasoq Naalakkersuisumut tapersiiginnarani ataatsimiititaliaq tunuliaqutaralugu oqaaseqartariaqartoq.
- Andreas Uldumip Aalisarnermut Ataatsimiititaliami siulittaasutut oqaaseqassaguni eqqaamasariaqarpaa, Aalisarnermut Ataatsimiititaliap isumaa aallavigalugu oqaaseqassasoq. Aalisarnermut Ataatsimiititaliaq ataatsimiissimanngitsorluunniit siulittaasua taamannak nammineq isummani aallaavigalugu tapersiiginnarsinnaanngilaq. Inatsisartutut pisussaaffeqarpugut suliap tamakkiisumik qulaajarlugu suliarinissaa aamma ataatsimiitsitaliami ilaasortat sulereerlutik isummeqatigiinnissaat pingaaruteqarpoq, Aleqa Hammond oqarpoq.
Aalisarnermut Ataatsimiititaliami sulisut akerliussutsimik takutitsisut tusarniartariaqarai Aleqa Hammond isumaqarpoq.
- Aamma ataatsimiititaliap saqqummiuttariaqarpaa sunarpiaq ajornartorsiutigineqarnersoq. Qanoq aaqqiissutissanik siunnersuuteqarnersoq, taamaasilluta Naalakkersuisunik aggersaanikkut aamma isumasioqatigiinnikkut aaqqiissutissamillu siunnersuuteqarnikkut peqataasinnaagatta. Ataatsimiititaliap sunniisinnaanera annertooq atorluarnerusariaqarpaa, Aleqa Hammond oqarpoq.
