Aalisarnermi aningaasat ingerlaarnerat misissorneqartariaqarpoq
![](/sites/default/files/styles/image_934x467/public/article_images/hellefisk_630_10.jpg?itok=fywhHQwq)
Nunatsinni inuussutissarsiutit pingaarnersaaanni aalisarnermi piginneqatigeeriaatsit arlalissuupput. Karl Lyberth Siumumeersoq maanna piumasaqarpoq aningaasat ingerlaarnerat misissoqqissaarneqassasoq. Tassani ilaatigut paasiniarneqassaaq Kalaallit Nunaat millionilikkaanik pissarsinngitsoortarsimanersoq.
Nunat avannarliit soorlu Danmark ukiuni makkunani nukippassuit atorlugit misissuipput nunamiit nunamut allamut aningaasanik nuussisarneq transfer-pricing atorlugu iluanaarniartoqartarnersoq. Taamaasiornikkut suliffeqarfiit ilaat sinneqartoorutissanik nunanut akileraartarnikkut sukangavallaannginneresunut nuussisarput. Maanna Karl Lyberthip paaserusutsappaa nunatsinni aalisarnermik ingerlatsisut akornanni aamma taamaasiortoqartarnersoq.
- Oqarsinnaanngikkaluarpunga toqqaannartumik pasitsaassaqarsimallunga. Kisianni assut paaserusuppara ilumut nunarput tamakkiisumik pissarsiassaminik pissarsisarnersoq pisuussutitta pingaarnersaannit, Karl Lyberth KNRimut oqarpoq.
Taanna inatsisartut ukiaanerani katersornissaannut siunnersuuteqarpoq suleqatigiissitaliortoqassasoq aalisarnerup iluani aningaasat ingerlaarnerannik qulaajaasussamik.
- Assut paaserusuppara aalisarnermi aningaasat sumut pisarnersut. Kikkut iluanaartarpat aamma iluanaarutit nunatsinniippat imaluunniit Danmarkimut pisarpat?, Karl Lyberth aperivoq.
- Nalunngikkaluarpara aningaasarpassuarnik nunarput aalisarnermit pissarsisartoq. Kisianni aamma paaserusunnarpoq ilumut aningaasat pissarsiarisinnaasavut tamaasa pissarsiarisarnerivut, Karl Lyberth tunngavilersuivoq.
Taassuma oqaatigaattaaq aningaasat ingerlaarnerannik qulaajaanissaq suliarujussuussasoq. Taamaattorli pissusissamisoorsoraa nunatsinni misissuisoqarnissaa misissuinerit taama ittut nunani avannarlerni ingerlanneqalereermata.