Aalisarneq pillugu ataatsimiititaliami isumaqatigiinngeqaat
Naalakkersuisut siunnersuutigaat aalisarnermut ullumikkut attuumassuteqavinngikkaluartut siunissami piginneqataasinnaalissasut. Tamanna Siumukkut akerleraat ikinnerussuteqarlutilli.
Aalisarnermut inatsisip allannguutissaatut siunnersuutip suliarinera upernaaq kinguartinneqarpoq neriuutigineqarmat atituumik isumaqatigiittoqarsinnaajumaartoq. Taamali pisoqanngilaq.
Siumukkut aarleqqutigaat aalisariutinik piginnittut ikittuinnaalerumaartut taakkuussasullu aningaasaatilissuit. Siumukkut ernumanerannut tunngaviuvoq pisassat tamakkisut iluanni amerlanerpaamik 10 procentimik pigisaqarsinnaanermut killigitinneqartup 15 procentimut qaffanneqalersaarnera.
- Siumumiit aarleqqutigaarput 15 procentimut piginnittuussaaneq qaffanneqaraluarpat piginnittuusinnaasut ikittuaranngornissaat taamaalilluni politikkikkut siunniussaq piginnittuunerup siammarnissaa killormut ingerlasussaavoq, Siumukkut aalisarnermut ataatsimiititaliami ilaasortaatitaat taama issuarneqarput aalisarnermut ataatsimiititaliap isumaliutissiissutaa ualimut inatsisartut sammineqartussaq naapertorlugu.
Taamaakkaluartoq amerlanerussuteqartut Inuit Ataqatigiit aamma Demokraatit isumaqarput taamatut aaqqiinnissaq pisariaqartoq aalisarnermut inerisarnissaanut aningaasanik pissarsisoqassappat.
- Inuit Ataqatigiinnit Demokraatinillu sinnissut isumaqarpuot inatsisissatut siunnersuut saqqummiunneqartoq aalisarnermi aningaasarsiornermik ineriartornermut nutarterinermullu tunngavissaasoq piukkunnartoq, aalisarnermut ataatsimiititaliaq taama isumaliutissiissummini allappoq.
Naalakkersuisooqatigiit inassutigaat allannguutissatut siunnersuut akuerineqassasoq, Siumukkut kinguartitsinissaq piumasaraat misissuinerit amerlanerit aqqusaaqqaarumallugit.
