Aalisakkat uulialu akikitsut siuariartorluarnissamut qulakkeerisut
Kalaallit Nunaanni Naatsorsueqqissaartarfiup 2016-imi nunanut allanut tunisat naatsorsorneri ullumikkut saqqummiuppai.
2015-imut naleqqiullugu qaffariaaterujussuaq 979 millioner koruuniuvoq, procentinngorlugu avammut tunisat 35,7 mik qaffariarsimapput.
Qalerallit raajallu avammut tunisat naleqarnerulersimanerat qaffariarnermut peqqutaanerupput, taakkumi avammut tunineqarnerini qaleralinnut qaffariaatit 404 millioner koruuniupput raajanullu qaffariaat 318 millioner koruuniullutik.
Koruunimik sipaagaqarneq koruunimik iluanaarutaasoq
Ilutigitillugulu nioqqutissanik eqqussuinerput appariaateqarsimavoq.
Eqqussanut aningaasartuutit 2016-imi 4.192 millioner koruuniusimapput.
Appariaat 2015-imut naleqqiullugu 295 millioner koruuniuvoq, procentinngorlugu -6,6 procentiulluni.
AAMMA ATUARUK Ingerlatseqatigiiffiit aningaasaqarnerat siuariartorfiusoq
Atortussiat ikummatissallu eqqussorneqartut tassaapput appariaateqarsimasut, 2015-imi 699 millioner koruuniusimasut 2016-imi 399 milliuninngorsimapput. Eqqussorneqartut appariaataat procentinngorlugu 42,9-uvoq.
Niuernermi oqimaaqatigiissut taamaalilluni 2016-imi 475 millioner koruuninik amigartoorfiuvoq, tamanna ukiup siulianut sanilliullugu niuernermi oqimaaqatigiissut 1 milliard 274 millioner koruuninik pitsanngoriarfiulluni.