Nunarput aningaasarsiornikkut 2016-imi siuariarujussuartoq

Aningaasaqarnermut Siunnersuisoqatigiit Nunatta aningaasaqarnera pillugu ukiumoortumik nalunaarusiartik pingasunngormat saqqummiuppaat. Aningaasarsiornerlu 2016-imi 4-5 procentinik siuariaraluartoq, 2017-imi 1 procentimut appaqqinnissaa naatsorsuutigineqarpoq.

Aningaasaqarnermut Siunnersuisoqatigiit naapertorlugit aalisakkat akisunerata annertuunillu sanaartornerit aningaasarsiorluarnermut pissutaapput.

- Aaqqissugaanikkut itinerusumiittut ajornartorsiutit taamaalillutik aaqqinneqarsimanngillat, taamaattumillu aningaasaqarnikkut ataavarnerusumik siuariarnissamut tunngavissamik pilersitsisoqarsimanani. Aaqqissuusseqqinnernut pisariaqartitsineq annertuujuvoq, aamma aaqqissuusseqqinnermik suliaqarnissamik kinguartitsinerup ajornartorsiutit annertunerulersittussaallugit aaqqinnissaallu sapernarnerulersissallugit, nalunaarusiami allaqqavoq.

Sinneqartooruteqalaarneq ajornartorsiutaasoq

2020-p tungaanut aningaasanut inatsisini katillugit 100.000 koruuninik sinneqartooruteqarfiussasut missingersorneqarpoq. Aningaasarsiorluarnerli eqqarsaatigalugu sinneqartooruteqarnerusoqannginnera ajornartorsiutaavoq.

- Ukiuni pitsaannginnerusuni nikeriarnerit passunnissaannut iliuuseqarnissamut periarfissaqarnermut tunngaviuvoq ukiuni pitsaasuni pakkersimaarinnissutissanik pileriartortitsinissaq, nalunaarusiami allaqqavoq.

Napatitsinermut siuariartitsinissamullu pilersaarut Naalakkersuisut saqqummiussinerata Aningaasaqarnermut Siunnersuisoqatigiit nuannaarutigaat. Nunatta aningaasaqarneranut unammilligassaq Naalakkersuisut qanoq iluarsiiffiginiarneraat pilersaarusiami nassuiarneqarput.

Siunnersuisoqatigiilli pilersaarusiaq erseqqippallaannginnerarpaat. Aamma nuussinernut aningaasartuutit sunnerneqarujussuanngikkaluarlutik pisortani 650 millionit koruuninik sipaaruteqartoqarniarnera apeqquserneqarpoq.

- Taamatut pitsannguinerit nammineq takkunnavianngillat, aamma politikkikkut akuerineqartunik aaqqissuusseqqinnernut naleqqiullugu siunissami sipaarutit piviusunngortinneqarsinnaanngitsut nalunaarutiginerisigut pisortat aningaasaqarneranni atasinnaassusermik angusaqarnerup ajornannginnerusinnaanera aarlerinarluni, siunnersuisoqatigiit allapput.

Misissuineq amigaateqartoq

Naalakkersuisut attaveqarnermut pilersaarutaata, Nuummi Ilulissanilu mittarfiit tallineqarnissaannik Qaqortumilu mittarfiliortoqarnissaanik ilaatigut imallip, tunngavia amigaateqartoq Aningaasaqarnermut Siunnersuisoqatigiit isumaqarput.

- Pilersaarutit tamarmik aamma silaannakkut angallanneq pillugu aamma mittarfiit ilaatillugit siunnersuutit ataatsimoortillugit pilersaarutip inuiaqatigiinnut akilersinnaaneranik misissuineq amigaatigineqarpoq, siunnersuisoqatigiit allapput.

Ilinniartitaaneq nalunaarusiami aamma allaaserineqarpoq. Meeqqallu atuarfiata ilinniarnermut tunngaviunera pissutigalugu ingerlalluarnissaa salliullugu isumagineqartariaqartoq, siunnersuisoqatigiit isumaqarput. Naalakkersuisullu meeqqat atuarfiat pillugu inatsisimik nutarteriniarnerata saniatigut annerusumik iliuuseqannginnerat, Aningaasaqarnermut Siunnersuisut isornartorsiorpaat.

- Meeqqat atuarfianni pitsannguutinut aalajangersimasumik iliuuseqarnissamut pilersaarutinik pilertortumik pisariaqartitsisoqarpoq, tamannalu inatsisitigut tunngavigineqartut iluanni sapernarnani. Tamanna politikkikkut pingaarnersiuinermi qullersaatinneqartariaqarpoq, siunnersuisoqatigiit nalunaarusiaminni allapput.

Missingersuusiornermili inatsit nutaaq Naalakkersuisunit Inatsisartut ukiakkut ataatsimiinneranni saqqummiunneqartussaq siunnersuisoqatigiinnut neriullualertitsivoq. Nunattami aningaasaqarneranut aqutsinermut erseqqissumik siuariaataasoq, Aningaasaqarnermut Siunnersuisoqatigiit isumaqarput.

Aningaasaqarnermut Siunnersuisoqatigiit nalunaarusiaat alaaserisap ataani kakkiunneqarsimasoq atuarneqarsinnaavoq.