Aalisakkat nungutaasinnaasut allattorsimaffiannut nipisaat ilaalerput
Nipisaalli nungutaasinnaaneri ilisimatuunit suli nalornisigineqarpoq.
Tattattoorsuup, tassa qallunaatut størip, suaat kiilumut gultip kilumut akianit qaffasinnerulernerisa kingunerannik, tattattoorsuit nungutaasinnaaneri qangali aarleqqutigineqalereerpoq. Nipisaallu suaat tunisaallualernerisa kinguneranik, nipisaat aamma nungutaasinnaaneri aarleqqutigineqalerluni. Tamannali uppernarsivinneqanngilaq suli. Tassami ilisimatuunit suli paasineqanngilaq, nipisaat nunarsuatsinni qanoq amerlatiginersut.
Kalaallit Nunaanni nipisaat ukiut qulit ingerlaneranni pisarineqartartut marloriaatinngorsimapput, taamaalilluni nipisaat ikilisimallutik. Nipisaalli Nunatsinni nungutaasinnaaneri aarleqqutigineqartariaqanngikkallartoq, Pinngortitaleriffimmi aalisakkat pillugit ilisimatooq, Rasmus Hedeholm, DR-imut oqarpoq.
- Nipisaat ikilisimaneri, WWF-ip uppernarsivillugu oqaatigisinnaanagu nalunaaruteqarput, taamaattumik uangut ernersuussutigut mianersornissamik aallaaveqarlutik, Rasmus Hedeholm oqarpoq.
Nunarsuatsinni pinngortitaq pillugu suliniaqatigiiffiup, WWF-ip innersuussutigaa, nipisaat suaasa nerineqartarneri taamaativinneqartariaqartoq. Tamannalu aallaavigalugu nipisaat, aalisakkat nunarsuatsinni nungutaasinnaasut allattorsimaffianniilernissaat aprilip aallaqqaataannit atuutilersussatut WWF-imit innersuussutigineqarluni.
Nipisaat suaannik nerisaqarnerup taartigisinnaasaannik, WWF-ip qullersaa, Gitte Seeberg ima siunnersuuteqarpoq.
- Eqaluit aamma ammassassuit suaat nerineqarsinnaalluarput. Nunarsuatsinni pinngortitaq pillugu suliniaqatigiiffiup, WWF-ip qullersaa Gitte Seeberg taama siunnersuuteqarpoq.