Aalisakkanik nioqqutissiortut 2021-imi aarlerinartorsiorataannaasut
Nunarsuup ilarujussua coronavirusip nunarsuaq tamakkerlugu siorna marsimi tuniluutilermalli unittoorpoq. Neriniartarfiit matorarput, nerisarfiillu matunerannik kinguneqartumik inuppassuit angerlartitaallutik.
Tamanna aalisakkat avammut tunisat nalingannut sunniuteqarujussuarpoq, taakkuami 2019-imi avammut tunisat nalinginut 307 millionit koruuninik nalikinnerupput.
Pissutsit ukiortaami ilorraap tungaanukarnavianngitsut, Sulisitsisut Polar Seafoodillu siulersuisuisa siulittaasuat, Henrik Leth, oqarpoq. Naamerluinnaq.
AAMMA ATUARUK Ukioq sakkortooq: Aalisakkanik avammut niuerneq 2020-mi 300 millionit koruuninik appartoq
- Amerlasooriarluta ajornartoortareerpugut. Tamakku nalaatassaasarput, siornatigulli ajornartoornivut niuffaffinni nioqqutit assigiiaat amerlavallaarujussuarnerannik aallaaveqartarput. Nioqqutilli maanna piumaneqarunnaaramik massakkut taamaaqqajanngilaq, taanna oqarpoq.
Ajornartoornerit assigiinngitsut ataatsikkut pisut
Aalisakkanimmi qalerualinnillu niuerfiit pingaarnerit, tassa neriniartarfiit nerisassiaarniallu nunarsuarmi nunani tamalaani killilersueqattaarnernit eqqugaarujussuarput.
- Massakkorpiaq pisut isumakulunnaqaat, coronami ajornartoortitsiuarsinnarami. Neriunniarta coronamut akiuussutissat pissutsit ukiup ingerlanerani ilorraap tungaanukarnissaannut iluaqutaassasut, Europalli annerpaartaani suut tamarmik massakkorpiaq matoqqapput, Henrik Leth nangippoq.
AAMMA ATUARUK Kalaallit Nunaat EU-lu aalisarneq pillugu isumaqatigiissusiortut
Nunatsinni aalisarneq aamma eqqugaarujussuarpoq, tassami saarulliit taavalu raajat uusut qalipaajakkallu Tuluit Nunaannut eqqussassat 20 procentimik akitsuuserneqarput. Tamanna Tuluit Nunaata EU-mit ukiortaami ilaasortaajunnaarneranik aallaaveqarluinnarpoq.
Nunalli unammillersigisavut, soorlu Canada, Norge Islandilu tuluillu niuernermut isumaqatigiissuteqarmata, taakkua avammut nioqqutissiaat akitsuuserneqanngillat.
- Tamanna Tuluit Nunaanni unammillersinnaassusitsinnut akornutaavoq, Henrik Leth oqarpoq. Tassami Tuluit naalafaaffeqatigiiffiat raajanik uusunik qalipaajakkanillu nunarsuarmi tunisaqarfiunerpaasarpoq.
Akinik appaasoqaqqissangatikkaat
Kinami oqartussat aalisakkanik qalerualinnillu eqqussuineq pillugu nutaanik aamma tunisakinnerulersitsisussanik maleruagassiorput.
Tamanna inuiaqatigiit sinnerinut minittornertulli siaruaattutut isikkulittut sunniuteqapiloorsinnaasumik akinik appaasoqaqqinneranik kinguneqartussanngorpasippoq.
- Akit appariartuinnassangatippakka. Tuluit Nunaannut eqqussassat 20 procentimik akitsuuserneqarnerat tunisinermi akit koruuninik marlussunnik pingasunilluunniit apparnerannik kinguneqapiloorataannaavoq. Taamaammat ilungersunartorujussuuvoq, akitsuuserneqarnerallu uagutsinnut akisoorujussuusinnaaavoq, Henrik Leth oqarpoq.
