Aajuku partiit ukiortaami oqaaseqaataat
Aatsitassarsiornerup annertusarneqarnissaa. Aluminiumik aatsitsiviliassap aalajangiiviginissaa. Inuiaqatigiinni toqqissisimanerup uterteqqinneqarnissaa. Nunaqarfiit illoqarfiillu avinngarusimasut atugarisaasa pitsanngorsarnissaat. Naalakkersuinikkut aporaaffiusut.
Tamakkuupput partiit siulittaasuisa ukiortaami oqaaseqarnerminni pingaarnertut saqqummiussaasa ilaat.
Aatsitassarsiornerup annertusarneqarnissaa tamatumalu kinguneranik suliffissat amerlanerit pilersinneqarnissaat partiit siulittaasuisa ukiumi 2012-mi ilaatigut pingaarnertut neriuutigaat. Soorlu Atassutip siulittaasuata, Gerhard Petersenip oqalugiaammini imatut oqaatigigaa.
- Atassutip atorfissaqartippai innuttaasut imminnut napatissinnaasut. Inuussutissarsiornerup, tunisassiornerup - pingaarnertullu suliffeqarfinnik pilersitsisinnaasut Nunatta pisariaqartippai, soorunami aamma nunami atorfissaqartinneqartunik piorsaasinnaasut ingerlatsisinnaasullu pisariaqartinneqarlutik, Gerhard Petersen allappoq.
Demokraatit siulittaasuata, Jens B. Frederiksenip 2012-mi pinngitsoorani aalajangiiffiussussaasut annertuut oqalugiaammini ilaatigut eqqaavai Alcoap Maniitsumi aatsitsiviliornialersaarnerata aalajangiiffiginissaa aammalu aatsitassarsiornerit nutaat suliffissanik nutaanik pilersitsisinnaasut, tamatumalu kinguneranik ilaqutariit ataasiakkaat aningaasatigut isaatitaannik amerlanernik qularnaarisussat eqqaallugit.
Kattusseqatigiit partiiata innuttaasut atugaat ilannguppai.
- Nunaqarfinni illoqarfinnilu isorliunerusuni innuttaasut atugaat pitsangortinneqartariaqarput, Kattusseqatigiit Partiiat sinnerlugu taama allappoq, Knud Fleischer.
- Nunaqarfimmiut illoqarfinnilu isorliunerusormiut pisiniarfeqarnikkut pisiniarsinnaanermikkullu ajornartorsiuteqartut pitsanngorsaavigineqartariaqarput, tassami inuit ilaasa aningaasarsiaat tunngavigalugit naapertuutinngilluinnartumik taakku atugassaqartinneqarmata, Knud Fleischer allappoq.
Siumup siulittaasuata, Aleqa Hammondi ukiortaami oqalugiaammini toqqissisimaneq tikitaasa ilagaat.
- Pingaaruteqarluinnarpoq inuiaqatigiinni toqqissisimanerup uterteqqinneqarnissaaa, innuttaasut tusaaneqarnerunissaat, isummat assigiinngiiaartut ataatsimoortinniarnissaat aammalu inuinnaat ataqqineqarnissaat, Aleqa Hammond allappoq.
- Tamat killilersorneqanngitsumik oqaaseqarsinnaatitaanerata ataqqineqarluni sumi tamani atuutsinneqarnissaa Siumumit pingaartipparput, Aleqa Hammond oqalugiaammini allappoq.
Inuit Ataqatigiit nittartagaanni partiip siulittaasua, Kuupik Kleist ukiortaami oqaaseqaateqarpoq.
- Piffissami annertuunik allanngortiteriffiusumi sakkortuunillu unammilligassaqarfiusumi naalakkersuinikkut siuttuulluni soorunami akeqarpoq, tamannali pissusissasimisoorluni, Kuupik Kleist allappoq.
Tassani pivaa aviisip Sermitsiap qinersisartunik isumasiuisitsinerani maanna qinersineqartuuppat partii kinguariartussatut ilimagineqalermat.
- Inuit Ataqatigiit iluareqqusaarnermik politikkeqanngillat. Partiitut ingerlanitsinni eqqortussaq ujartuiffigiuarparput, siunissaq ungasissoq naleqqersorfigalugu isummersortarluta aalajangersaasarpugut, Kuupik Kleist allappoq.
