Aajuku Greenpeace-p umiarsuaaniittut

Greenpeacep umiarsuaani Esperanzami inuttanut ilaavoq Luke, Tuluit Nunaanneersoq. Luke aperaarput, sooq Cairn Energyp uuliamik misissuiniarnera akerliuffigitigineraa.

- Mexicop kangerliumanersuani uuliamik maqisoortoqarmat, nammineerlunga maqisoorfimmi najuutinngilanga. Kisianni tusagassiutitigut malinnaavunga, soorlu ukiuni kingullerni aamma uuliamik maqisoornerit arlallit malinnaavigigikka. Maanna issittup imartaani aamma qillerisoqalerpoq, issittup imartaani uuliamik maqisoortoqassagaluarpat naluarput qanoq kinguneqassanersoq iliortoqassanersorlu. Taamaammat ajutoortoqannginnissaa anguniarlugu, uuliasiortoqanngilluinnarnissaanik anguniagaqartuuvunga, nassuiaavoq.

Luke maanna Leiv Eirikssonimi tassa uuliamik qillerivimmi akunnerni 24-ni akerliussutsimik takutitsilluni qaqeqqareerpoq.

Greenpeacep umiarsuaataani Esperanzami inuuneq qanoq innersoq Lukep ima oqaluttuaraa.

- Angallammi inuuneq misigisaqarfiulluartarpoq, pikkunartarlunilu. Misigissutsit assigiinngitsut maani misigisarpavut, imaassinnaavoq angallat angisorineqartartoq, kisianni inuuffigalugu mikivoq. Taamaammat maani inuttaqativut, qanimut ilisimasarivagut sunerilu tamaasa nalussanagit. Kisianni  nuannisartaqaagut, aamma angallammiilluni nuanneqaaq, Esperanzami inuttaq Luke oqarpoq.

Luke qillerivimmi akunnerni 24-t sinneqartuni issimavoq, umiarsuarmioqatini ataaseq ilagalugu.

Nittartakkatsinni www.knr.gl-imi Esperanzami tallimanngormat assilisat takusinnaavasi.