Inuusuttut malinnaaffigineqarlutik tapersorneqartut
Inuusuttut katillugit 39-t Kommuneqarfik Sermersuumit malinnaaffigineqarlutik ukiuni kingullerni tapersersorneqarput.
Suliniutip inuusuttut inersimasutut namminneerlutik inuulernissaannut ajornannginnerulersitsinissaq siunertaraa. Atugarliorluni inuusimalluni angerlarsimaffiulluunniit avataani inissinneqarsimasuulluni inersimasutut inuuleriartorneq toqqissisimaffiukkajunngilaq piumasaqaateqarfiusupilussuartullu misigisimaffiusinnaasarluni.
Kommuni tusagassiuutinut nalunaarummi taama allappoq.
- Inuusuttut amerlasuut naapittakkavut sivisunerulaamik inuusuttuunissaminnik pisariaqartitsisarput – naak pappiliatigut inersimasunngoraluarlutik. Imaassinnaavoq pingaarutilinnik assigiinngitsunik ilikkagaqarnissaminnut periarfissaqarsimanngitsut, soorlu akiligassanik akiliinermut imaluunniit ulluinnarni pilersaarusiornissamut.
- Tassani aqqutaanni ikiuutissaagut tapersersuillutalu – tamatigut naligalugit inuunerminnilu inissisimanerannik ataqqinnilluta, malinnaaffiginninnermik suliallit ilaat tusagassiuutinut nalunaarummi oqarpoq.
Toqqissisimaneq inuunermi kajumissuseqalertitsisartoq
Inuusuttunut tapersersuinissamut malinnaaffiginninnermut sulianit 39-nit 14-it manna naammassereerput. Sullinneqarsimasut arlallit aalajangersimasumik suliffittaarsimapput, ilinniagaqalersimallutik namminnerluunniit ineqalersimallutik.
Malinnaaffiginninnerli suliassanut tapersersuineruunnaanngilaq, kisianni aamma toqqissisimanissamut, inunnullu allanut atassuteqarluarnissamut tunngavoq. Tamakku inuusuttunut naamineersinnaatitsinerussapput, inuunerminnilu kajumissuseqarnerulertitsissallutik.
Inuusuttullu inersimasunngornissamut ikaarsaarnerminni ikiorneqaraangamik imminnut uppereqqilertartut, inunnut allanut attaveqarluariartortartut namminnerlu inuunerminnut akisussaassuseqarnerulertartut kommunimi sullissisunit malugineqartarpoq.
- Inuusuttut tapersersorneqarnertik ilinnialernissaminnut sapiillisitsisimasoq imminnullu upperinerminnut iluaqutaasimasoq oqaluttuaraangata, suliniut iluaqutaasartoq paasisarparput, fagchefi Maliina Jung Jørgensen tusagassiorfinnut nalunaarummi oqarpoq.
Tapersersorneqarneq toqqissisimalluni nammineersinnaaleraluttuinnarnermut sakkoqalertitsisoq inuusuttut malinnaaffigineqartut ilaat oqaluttuarpoq.
- Inersimasunngornermi aqqusaagassat unammillernartut anigornissaannut amerlasuunik sakkussanippunga. Peqqinnarnerusumittaaq eqqarsarsinnaaneq ilikkarpara, oqaloqateqarluarlunga siunissamilu atorsinnaasannik paasisaqarlunga, sullinneqartut ilaat oqarpoq.
Kommunip malinnaaffiginninnermik suliniut pitsanngorsarniaraa
Kommuneqarfik Sermersooq malinnaaffiginnilluni suliniummik naammassinnilluarsinnaajumalluni pitsaanerulersitsinissamik siunertaqarpoq, taamaalilluni inuusuttut pisariaqartitsisut nammineersinnaanngornissaannut tapersersorluarneqarnissaat qulakkeerneqarniassammat.
- Sullissisuttaaq ullut tamaasa tunniusimalluinnarlutik sulinerat nersualaassallugu eqqaamasariaqarparput – taakkoqanngippammi inuusuttut toqqissisimanermik misigisimanavianngikkaluarput, malinnaaffiginninnerullu inuiaqatigiinnut iluaqutaanissaanut piviusunngortitsisuummata, Maliina Junge Jørgensen oqarpoq.
