81-iliisup Bidenip ukioqqortunera qinersisartut akornanni ernummataasoq

Inuit apersorneqartut 74 procentii Biden præsidentioqqinnissamut utoqqaavallaarsorigaat, inunnik isumasinerup takutippaa.
USA-mi qinersisartut akornanni isumasiuinerit naapertorlugit præsidentip ukioqqortunera ernummatigineqarpoq. Assersuutigalugu præsidentip timmisartorsuanut ikilernermi majuartarfikkut qummukarnermi ilaatigut pangallattarnera, oqalugiarnermilu oqartoortarnera piffissami kingullermi uparuartorneqartarsimavoq. Assi © : Julia Nikhinson/Reuters/Ritzau Scanpix
Allattoq Ritzau
novembarip 20-at 2023 14:37
Nutserisoq Mads Lynge

USA-p præsidentia Joe Biden ataasinngornermi 81-iliivoq.

Bidenilli inuuissiornini pillugu oqaaseqarnissaa ilimagineqanngilaq.

USA-mimi demokratit sinnerlugit præsidenti USA-p oqaluttuarisaanerani aatsaat taama ukioqqortutigaaq, præsidentimullu aappaagu qinersinermi ajugaassagaluaruni præsidentiunermi naammassinerani 86-inik ukioqalersimassalluni.

USA-mi qinersisartut akornanni isumasiuinerit naapertorlugit præsidentip ukioqqortunera ernummatigineqarpoq.

Assersuutigalugu præsidentip timmisartorsuanut ikilernermi majuartarfikkut qummukarnermi ilaatigut pangallattarnera, oqalugiarnermilu oqartoortarnera piffissami kingullermi uparuartorneqartarsimavoq.

Inuit apersorneqartut 74 procentii Biden præsidentioqqinnissamut utoqqaavallaartoq, nutaarsiassaqartitsiviit ABC-p The Washington Postillu inunnik isumasinerisa takutippaa, Donald Trumpilu utoqqaavallaartoq 50 procentii isumaqarlutik.