Angut 33-nik ukiulik meeqqanut kanngutsaatsuliorsimanermut suliami allami 2015-imi eqqartuussineqarpoq. Taamani meeqqanut kannguttaatsuliorsimanerni assigiinngitsuni pingasuni eqqartuussaavoq.Assi: KNR

33-nik ukiulik meeqqanik pornoliat pissutigalugit qaammatinik qulinik pineqaatissinneqartoq

Angut meeqqanik pornolianit assit 18.000-it sinneqartut filmiliallu 5.000-it toqqartaatigisimavai, taannalu meeqqamut kanngutsaatsuliorsimasutut siusinnerusukkut eqqartuussaanikuusimavoq.

Angut 33-nik ukiulik qaammatini qulini pineqaatissinneqarsimasunut inissiisarfimmiittussanngortinneqarpoq.

Nunatta Eqqartuussisuuneqarfia eqqartuussivimmi sulianik isumaginnikkiartorluni sapaatip akunnerata siuliani Sisimiuniippoq, tassanilu 33-nik ukiulimmut tunngatillugu eqqartuussivimmi suliaqartoqarluni.

Nunatta Eqqartuussisuuneqarfiata angut meeqqanik pornolianik assinik 18.000-nit amerlanerusunik filmilianillu 5000-inik amerlanerusunik toqqortaateqarsimasutut eqqartuuppaa.

Tamatuma saniatigut assinik filmilianillu 1.000-nit amerlanerusunik siammarterisutut aamma pisuutinneqarpoq.

Angutip eqqartuussiviup qaammatini arfineq marlunni pineqaatissinneqarsimasunut inissiisarfimmiitsitsisussanngortinnera sakkukinnerulersinniarlugu eqqartuussut suliassanngorteqqissimavaa, eqqartuussulli sakkukillineqarani qaammatinut qulinut sivitsorneqarpoq.

Nunatta Eqqartuussisuuneqarfiata angutip meeqqanik pornolianik toqqortaateqarnerata annerussusaa imarisaasalu ilungersunarluinnarnerat ingammik pingaartuutippaa.

Unnerluussisussaatitaasuunerup, Mads Schønning Frandsenip suliaq nunatta eqqartuussisuuneqarfiani ingerlappaa, taassumalu eqqartuussut ilorrisimaarutigaa.

- Assit filmiliallu tamarmik immikkorluinnaq nunarsuarmi sumiiffimmi arlaanni meeqqamut atornerluinermut tunngassuteqarput. Taamaammat suliami sakkortunerusumik pineqaatissiisoqarnissaanut innersuussuteqarnera Nunatta Eqqartuussisuuneqarfianit malinneqarnera ilorrisimaarutigaara, unnerluussisussaatitaasuuneq oqarpoq.

Angut 33-nik ukiulik meeqqanut kanngutsaatsuliorsimanermut suliami allami 2015-imi eqqartuussineqarpoq. Taamani meeqqanut kannguttaatsuliorsimanerni assigiinngitsuni pingasuni eqqartuussaavoq.

Nunatsinni meeqqanik pornoliat pillugit suliat 2020-mi aqqaniliupput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat