26-nik ukiulik toqutseriarsimasutut unnerluutigineqarnermini Nunatta Eqqartuussisuuneqarfianit pinngitsuutinneqartoq

Toqutseriartoqarsimanera pillugu suliaq Nunatta Eqqartuussisuuneqarfiani ippassaq ullumi suliarineqarpoq.

Angut 26-nik ukiulik angummut 50-inik ukiulimmut igaffimmi savik atorlugu niaquatigut kapiseriarsimasutut pasineqarnini pissutigalugu toqutseriarsimasutut unnerluutigineqarpoq.

Unnerluussut naapertorlugu pinerlineqartup pakkersimaarniaalluni savik assaminik illuttut tigoriarsimagamiuk assamini itisuunik ikilerneqarlunilu niaqqumigut kilerneqarpoq.

Eqqartuussivimmit eqqartuunneqartoq

Unnerluutigineqartoq Eqqartuussisoqarfik Qeqqatamit ukiuni sisamani pineqaatissinneqarsimasunut inissiisarfimmiittussanngortinneqarluni novembarimi eqqartuunneqarpoq. Nunattali Eqqartuussisuuneqarfia allatut eqqartuussuteqarpoq.

- Nunatta Eqqartuussisuuneqarfiata angut toqutseriarsimasutut pinngitsuutippaa, nakuusersimanerli pissutigalugu ukiumi ataatsimi pineqaatissinneqarsimasunut inissiisarfimmiittussanngortillugu, suliami unnerluussisoq, Signe Suhr oqarpoq.

Naak angut 26-nik ukiulik nakuuserneq pillugu eqqartuunneqaraluarluni ukiorlu ataaseq pineqaatissinneqarsimasunut inissiisarfimmiittussanngortinneqaraluarluni maanna aniguivoq.

Tamatumani qaammatini kingullerni qulini pineqaatissinneqarsimasunut inissiisarfimmiissimanera pissutaavoq. Taamaammat maanna iperagaavoq.

- Eqqartuunneqarsimagaanni pineqaatissiissutillu piffissaata pingajorarterutai marluk inissiisarfimmeereeruni misiliutaasumik aniguisinneqarsinnaavoq. Taamaammat Nunatta Eqqartuussisuuneqarfiata ullumi iperagaatippaa, angutip eqqartuussissuserisua, Christina Johnsen eqqartuussutip oqaatigineqarnerata kingunitsianngua oqarpoq.

Nutserneqarneri pingaaruteqartut

Angutip Eqqartuussisoqarfik Qeqqatamit ukiunik sisamanik pineqaatissinneqarsimaneranit Nunatta Eqqartuussisuuneqarfiani pinngitsuutinneqarneranut tunngasoq unnerluussissutip nutserneqarnerani nassaassaasoq, Christina Johnsen oqarpoq.

- Illersukkama pinerlineqartoq unnerluussisussaatitaasumi allassimasutulli kaperiarsimanngikkaa eqqartuussivimmi saqqummiunneqarpoq, taanna oqarpoq.

Pinerlineqartup tamanna killisiorneqarnermini nassuiaatigaa, eqqartuussissuserisup oqaatigaa. Taassuma oqarnera naapertorlugu tamanna pasineqartup toqutseriarsimasutut Nunatta Eqqartuussisuuneqarfianit pinngitsuutinneqarneranut nassuiaatissap ilagaa.

Unnerluussisup, Signe Suhrip suliap maanna naammassineqarnera aamma pitsaasuusoraa.

- Naak suliami taperserneqanngikkaluartugut suliap maanna naammassineqarnera tamanut pitsaasuusoraara. Naammassineqarneralu malissavarput, tamannami eqqartuussiveqarnermi qullersamit aalajangerneqarpoq, taanna oqarpoq.