Norsaq mittarfinnut 2200 meterinut missinnaassasoq
Nuummi Ilulissanilu mittarfiit pilersaarutit malillugit 2200 meterinut tallineqassapput, airbussilu taakkununnga missinnaakuttoorpoq.
Mittarfissuaqalerpalli timmisartut qanoq ittut atorneqassanersut suli aalajangerneqanngilaq.
- Ingerlatseqatigiiffik tamakku pillugit iliuusissaminik suliaqaleruttorpoq. Mittarfinnulli eqqaasatsinnut Norsaq ajornaquteqanngitsumik missinnaakuttoortoq, pisortaq Jacob Nitter Sørensen KNR-imut oqarpoq.
AAMMA ATUARUK Jacob Nitter Sørensen Air Greenlandimi pisortaaninngorpoq
Norsaq sapaatip akunnera una Zürichiliaanneqassaaq, tassanilu misissorluarneqassaaq ilaatigullu nutaanik motorilerneqassalluni.
- Aalajangeratta ilua nutarterniarlugu. Aamma allanik annertunerusunik timmisartumi suliassaqarpoq.
Taamaaliornitsinnulli peqqutaanngilaq Nuummi Ilulissanilu mittarfiit tallineqareerlutik atorneqalerpata Air Greenlandip naatsorsuutigigaa airbussip suli atuinnarneqarnissaa.
AAMMA ATUARUK Akit qaffannissaat atorfissaqartinngilarput
Suli nutaanngilinngitsoq
Naak Norsap Airbusiliorfissuaq qimammaguli ukiut 20-nnguleraluartut, imaanngilaq mittarfissuit nutaat pilersaarutaasut malillugit 2022-mi atorneqalerpata timmisartoq taanna suli atorneqartoq.
- Timmisartut nutaanngissusaat ukiut atorneqarfii malillugit naatsorsorneqartanngillat, qasseriarlutilli qangattarlutillu missimanersut, imaluunniit akunnerit qassit timmisimanersut aallaavigalugit naatsorsorneqartarput, taakku eqqarsaatigalugit Norsaq pisoqaasutut nalilerneqarsinnaanngilaq. Timmisartut taama ittut atasinnaassusaat eqqarsaatigalugu maannamut aallarnerit minnerillu aatsaat affaa Norsap nalleraa, Air Greenlandimi pisortaq Jacob Nitter Sørensen oqarpoq.
Januaarip 25-anniit februaarip 21-annut Norsap suliarineqarnerani Air Greenlandip portugalimiut timmisartortitseqatigiiffiat Hifly sapaatip akunneranut sisamariarluni Københavnimiit utimullu timmisartuussisartussatut attartorsimavaa.
