22-nik ukiulik saqqummersitaminik nuannaartitserusuttoq
Nipilersortartup nalunnginneqarluartup nipilersornermigut tusarnaartartuni qiimmaallannartumik tiguarusuppai.
- Asanninneq pingaartittorujussuusimavara, inuuninni pingaarnerpaat ilaanniikkami asanninneq. Kisianni aamma assigiinngitsunik, soorlu qiimaneq neriunnerlu uanga nammineq pingaartitakka allaaserisimavakka, 22-nik ukiulik Nick Ørbæk taama oqarpoq.
Taanna nipilersornerup silarsuaani nutaraanngilaq, nipilersoqatigiinnimi assigiinngitsuni nipilersoqataasarnerminit nalunnginneqarluarpoq.
Taalliorneq aqqutigalugu misigissutsini oqaasinngortissallugit pikkoriffiginerullugu oqaatigaa.
Inuunermi
Nuuteeqqami taallat ilaat "Inuunermi" januaarip 15-iani facebookikkut ussassaarutigalugu saqqummersitaa sapaatit akunneri marluk ingerlanerinnaani 25.000-teriarlugu takuneqareersimavoq.
- Inuunermi aqqusaagassat nuannertuinnaanngillat, ilai aamma sakkortusarput, kisianni unammiinnarlugit inuuneq qaammaqqikkumaarpoq, Nick Ørbæk oqarpoq. Ilisimatusarfimmi inuiaat kultuariat oqaluttuarisaanerallu Nickip ilinniarpaa.
Saqqummersitanilu tusarnaartussamut iluaqutaajumaartoq neriuutigaa:
- Neriuppunga inuit ikiortitut isigisinnaassagaat, uanga tamanna neriuutigivara taalliortutut annippara neriullunga allanut ikiusinnaassasoq.
Nick Ørbækip nuuteeraliaa "Saappara" februaarip ulluisa aallaqqaataanni saqqummissaaq.
