2023-mi naartuersittut aatsaat taama amerlatigisut: “Nunanut allanut sanilliullugu amerlapput”

Kissaatiginngisamik naartulernissaq pinaveersaartinneqarnerusariaqartoq, Nunatsinni Nakorsaaneqarfimmit oqaatigineqarpoq. Siornami naartuersittut 1000-t sinneqartut kisitsisit nutaat takutippaat.

Allattoq Ann-Sophie Greve Møller, Ulrikke Andersen

septembarip 20-at 2024 12:28

2023-mi naartuersitut ukiuni qulini kingullerni aatsaat taama amerlatigipput. Tamanna kisitsisini nutaani Nakorsaaneqarfiup saqqummiussaani takuneqarsinnaavoq.

Nunatsinni siorna naartuersittut 1034-upput. 2022-mi naartuersittut 857-iupput, tassa amerleriaataasoq 21 procentiulluni.

- Naartuersittut amerlapput nunanullu allanut sanilliullugu amerlaneroqaat, Nakorsaaneqarfimmi peqqinnisamut tunngasunut siunnersorti, Louise Faber, oqarpoq.

2023-MI NAARTUERSITTUT

Arnat naartusinnaasut siorna naartuersittut ukiuni qulini kingullerni aatsaat taama amerlatigipput.
2023-imi naartuersinnerit 1034-upput naartuersittullu 988-iullutik.
Arnat naartusinnaasut 1.000-iuppata 69-it naartuerneqarput.
Naartuersittut Peqqinnissaqarfik Qeqqani amerlanerpaapput Peqqinnissaqarfik Avannaanilu ikinnerpallutik
Arnat naartusinnaasut 1.000-iuppata naartuersittut 2.572-iupput. Taamaalilluni arnat 1.000-iuppata ernisut 1.731-iullutik, arnat amerlassusaannut sanilliullugit ukiumut uumallutik inunngortuniit naartuersittut amerlanerujussuupput.
Naartuersittut amerlanersaat 20-t 24-llu akornanni ukioqarput.
Nakorsaatit atorlugit nartuersittut 870-iupput, suliaritillutillu naartuersittut 158-iupput.
Tasiilami suliaritillutik naartuersittut amerlassutsimikkut nuna tamakkerlugu suliaritillutik naartuersittut pingajoqarterutigaat.
Arnat 28-it kingusissukkut naartuersinnissamik 2023-mi qinnuteqarput, taakkunannga 27-it akuerineqarput ataaserlu itigartitaalluni.
Pitsaanerusumik nalunaarsuineq naartuersittunillu sukumiinerusumik nalunaaruteqartarneq, amerlinerannut patsisaasut ilagisinnaavaat.

Najoqqutaq: Nunatsinni Nakorsaaaneqarfik

Allisiguk

Danmarkimi 2023-mi naartuersittut 15.260-iupput. Inuttussuserli aallaavigalugu nunatsinni naartuersittartut suli amerlanerupput.

Nunatsinni arnat naartusinnaasut 1000-uppata 69-it naartuersittarput. Danmarkimili Norgemilu arnat naartusinnaasut 1000-uppata qulit naartuersittartut, Louise Faber paasissutissiivoq.

Ilumut 2023-mi naartuersittut amerlanerusimanersut imaluunniit naartuersittunik nalunaarsueriaatsip pitsaanerulersimaneranik peqquteqarnersoq Nakorsaaneqarfimmit qulakkeerlugu oqaatigineqarsinnaanngilaq.

- Ukiumut qassit naartuersissimanersut illoqarfiit tamarmik Nakorsaaneqarfimmut nalunaartigisassaraat – tamanna eqqumaffiginerulersimasinnaavarput, Louise Faber nassuiaavoq.

Usuup puui akeqanngitsut naammanngitsut

Naartuersittartut ukiuni qulini kingullerni amerlassusaat 855-it 931-illu akornanni nikerarpoq. Naartuersinnerpassuit sumik patsiseqarnersut, Louise Faberip oqaatigiuminaatsippaa.

- Inuttut aqqusaakkat naartuersinnermut patsisaasinnaapput. Nakorsaatit atorlugit naartuersinneq anniarnermut tunngasarpoq. Soorunami aamma tamanna arnanut tarnikkut kingunerluuteqarsinnaavoq, taanna oqarpoq.

Aamma atuaruk Naartuiisarneq: Nuummi iisartagaliisoqartartoq Tasiilami sinitsitsillutik naartuiisartut

Kissaatiginngisamik naartulerneq aamma kinguaassiutitigut nappaatit pinngitsoortinniarlugit oqartussat usuup puuinik akeqanngitsunik nakorsaataarniarfinni suliffeqarfinnilu assiginngitsuni tigoriaannarnik peqartartut, taanna oqarpoq.

- Pinaveersaartitsinerusoqartariaqarporli. Kikkuttaaq pineqarnersut apeqqutaasorujussuuvoq aamma naartuersittarneq kinguaassiutitigullu nappaatinut tunngasunik ilisimasanik siaruaaneq inuttullu imminut qanoq paarilluarsinnaanerup paasissutissiissutigineqarnissaat apeqqutaapput, Louise Faber oqarpoq.

Naartuersittuni 20-t 24-llu akornanni ukiullit amerlanerpaapput. Tulliilu tassaapput 15-iniit 19-inut ukiullit.

Nakorsaatit atorlugit naartuersittut 870-iupput suliaritillutillu naartuersittut 158-iupput. Tasiilami suliaritillutik naartuersittut amerlangaarmata nuna tamakkerlugu suliaritillutik naartuersittut pingajorarterutigigaat Nakorsaaneqarfimmit oqaatigineqarpoq.

Nutaarsiassami kukkunermik nassaarsimaguit uunga allaffigineqarsinnaavugut.