Sermersooq: Suliat meeqqanut tunngasut 1200-t ukiorpassuit suliassaapput

Kommuneqarfik Sermersuumi meeqqat pillugit suliat amerlasoorpassuit ilaat maanna suliarineqareerput immikkoortinneqarlutillu. Suliallu sinneruttut 1200-t maanna misissuiffigineqartussanngorput, naammassillugillu suliarineqarnissaat sivisussasoq, kommunip Meeqqanut Ilaqutariinnullu Ingerlatsiviani pisortaq, Martha Lund Olsen, oqarpoq.

Namminersorlutik Oqartussat nakkutilliisuisa aasaq nalunaarusiaanni paasineqarpoq Kommuneqarfik Sermersuup meeqqat pillugit sulianik ingerlatsinera annertuumik amigaateqartoq.

Kingornalu Kommuneqarfik Sermersuup meeqqat pillugit suliat ammasut 2000-it misissuiffigai, taakkunanngalu 800-t imaaliallaannaq aaqqiissuteqarfigineqarsinnaasut matuneqarput.

Suliallu sinneruttut 1200-t, meeqqanut paaqqinnittarfinniittunut, angajoqqaarsianiittut imaluunniit tapersersorneqarlutik ilaquttaminni najugaqartunut tunngassuteqartut, kommunip maanna misissuiffigileruttorpai.

Suliallu 200-nit 300-nut amerlassuseqartut suli tamakkiisumik paasiniaaffigineqarsimanngillat. Tamatuminngalu suliaqarneq suli ingerlavoq:

 - Annertunerusumik paasiniagassatsinnik aamma suliassaqarpugut, socialfagligundersøgelsimik misissueqqaarluta aatsaat naliliilluarfigisinnaasatsinnik. Suliat massakkut ingerlapput, Martha Lund Olsen taama oqarpoq.

Taassuma oqaatigaa suliassarujussuaq ingerlatsivimmit ingerlanneqartoq. Taamaammallu amerlanerusunik sulisussarsiortoqartoq:

- Immikkut tallimanik sulisussarsiorpugut taakkuninnga aamma suliaqartussanik.

AAMMA ATUARUK Sermersuumi meeqqat pillugit suliat 800-it naammassineqartut

Kommunimi sulisut suliarpassuit suliaralugillu misissuiffigileruttorpaat. Sulialli meeqqanut tunngasut tamakkernissaannut piffissaq sivisussasoq, Martha Lund Olsenip oqaatigaa.

- Piffissaq sivisunerulaartoq atornissaa naatsorsuutigaarput. Ukua tallimat immikkut atorfiit ukiuni marluugallartuni pigivagut imaassinnaavoq aamma ukiut pingasunngornissaanik takorloorsinnaagipput sivitsorneqarnissaa, Kommuneqarfik Sermersuumi Meeqqanut Ilaqutariinnullu Ingerlatsivimmi pisortaq, Martha Lund Olsen, taama oqarpoq.

AAMMA ATUARUK Sermersuumi meeqqat pillugit suliat 800-it naammassineqartut

AAMMA ATUARUK Inunnik Isumaginnittut meeqqanut tunngasunut sulianut sakkussaqarnerulersut