Atassutip Naalagaaffeqatigiinneq suli pingaartippaa
- Inatsisartuni ataatsimiinneq tusarnaartaraanni tamanna sutigut tamatigut Atassummit saqqummiunneqartartoq tusaaneqartarsimassaaq, aamma tusarnaartartunit eqqaamaneqassaaq. Kisianni taassuma saniatigut Folketingiminngaanniit qinikkat naapikkaangatsigit tamatigut oqaluttuuttarpagut Naalagaaffeqatigiinneq pillugu politikkerput, aammalu suna tamaat periarfissaasinnaasoq aamma atortarlutigu. Isumaqarpunga tamanna erseqqissartuarlutigu annertuumik suliaqartuusugut, Atassut sinnerlugu Inatsisartuni ilaasortaq Steen Lynge taama oqarpoq.
Namminiilivinnissamik kissaateqarneq Inatsisartuni politikerinut tappiillisitsivoq, Søren Espersen taama isumaqarpoq. Nunatsinni partiimik Naalagaaffeqatigiinnerup ingerlaannarnissaanik kissaateqartumik Nunattalu ajornartorsiutaanik aaqqeerusuttumik ujartuilluni.
Aamma atuaruk Nunatsinni nutaamik partiiliortoqarnissaa Espersenip kajumissaarutigigaa
Naallu aningaasaqarnikkut politikkikkullu namminiilivinnissamut Kalaallit Nunaat suliniuteqaraluartoq, Naalagaaffeqatigiinneq Atassummut pingaaruteqartoq, Steen Lyngep oqaatigaa:
- Isumaqarpunga Atassumminngaanniit una oqariartuutigisaripput ersarissorujussuaq: Siunissami aningaasaqarnikkut politikkikkullu namminiilivikkaluarluta erseqqissumik taajuarparput Danmarkimut suleqatiginninnissarput pingaartillutigu siunissami. Tassa taanna allaassutigivarput partiit allanit, Steen Lynge oqarpoq.
Søren Espersenip Dansk Folkepartimeersup Nunatsinni pissutsinut ilisimakinnera ilaatigut saqqummertartoq, Steen Lyngep oqaatigaa, imatullu kaammattuuteqarluni:
- Isumaqarpunga Søren Espersen taavalu aamma Folketingimut ilaasortat Nunatsinni atugassarititaasut Danmarkimilu atugassarititaasut naligiinnerusumik aaqqiivigineqarsinnaanerat sulissutigisariaqaraat, Atassut sinnerlugu Inatsisartuni ilaasortaq Steen Lynge KNR-imut taama oqarpoq.
