Immikkoortitaaneq kalaallit Danmarkimiittut misigisarpaat. Sulili ukiorpassuarni allanngorsinnaagunanngillaq

- Ilinniartitsisorput klassetsinni oqarpoq, uanga isigiitigalunga, kalaallit tamarmik imerajuttuusut. Amerikami, Canadami aamma Kalaallit Nunaanni nunap inoqqaavisa pinerini tamanna pivoq.

Nalunaarusiami assersuutit ilaat taama nipeqarpoq. Misissuineq Danmarkimi Inuttut pisinnaatitaaffiit pillugit Institutimit suliaavoq. Kalaallit Danmarkimi ilinniartutut misigisaannik misissuinerulluni.

Assersuullu taannaannaanngilaq.

Kalaallit ilinniartut immikkoortitaasarnerannik ajornarsiut qaangerniarlugu pinaveersaartitsinermi iliuusissanik pingasunik Institut-i innersuussuteqarpoq.

- Unnuammi ingerlanerinnaani qaangiussimanavianngilaq. Nalunaarusiatsinni Danmarkip kalaallinut ilinniartunut pisussaaffeqarnera taavarput, Institut for Menneskerettigheder i Danmark-imi pisortaq Louise Holck oqarpoq.

Pisussaaffeqarneq tassaavoq, Danmarkimi ilinniarfinni ingerlariaqqiffiusuni kalaallit ilinnialersut aporfissalersorneqannginnissaat aamma ajornartorsiutissaannik tuniorarneqannginnissaat.

Kisianni sulerujussuaq, pisortaq isummersorpoq.

- Kalaallinut ilinniartunut Danmarkimi toqqissisimatitsinissaq ilinniarfimmilu akuulluartitsinissaq Danmarkip pikkoriffiginngilaa.

- Kalaallit ilinniartut ilimasupiluffigineqareertartut, immikkoortitaanerat akuerinninnginnermut tunngasuusartoq aamma ilinniartup ilinniarfimmi akuutinneqanngikkaangami atuaqatiminut akuunissani tunuarsimaarfigisaraa misissuinitta takutippaa, oqarpoq.

Ilinniarfiit akisussaaffeqarnerusariaqartut

Nalunaarusiap takutippaa inuusuttut tallimaagaanga ataatsip nikassagaalluni immikkoortitaaneq ukiumi atuarfiusumi kingullermi misigisimagaa. Immikkoortitaaneq inuusuttup praktikkerfissamik suliffimmilluunniit qinnuteqarnerani imaluunniit eqimattani suliaqarnerni peqataatinneqanngikkaangat pisarpoq.

- Takusinnaavarput ilinniarfinni qinngasaarinaveersaartoqartaraluartoq, taamaakkaluartoq kalaallit ilaannut immikkoortitaanerit nikassaarpasittut, kalaaliunerallu pillugu qanoq ittuuneraanerit aamma uumisaanerit pisarput, oqaluttuarpoq.

Ajornartorsiut, pisortap iluarsiivigisassatut artornarnerpaassasutut isigisaa tassaavoq, kalaallit ilinniartut ilinnialernerminni maluginiarsimasamittut misissuinermi taasimasaat, tassa danskit Kalaallit Nunaanni pissutsinik ilisimasaqaqqalaarnerat.

Kisianni tamanna Louise Holckip iliuuseqarfigisinnaanerarpaa.

- Ilinniartut danskit Kalaallit Nunaanni pissutsitut ilisimasaat arlalitsigut taamaassorinninnerusarput. Taamaammat isumaqarpugut Kalaallit Nunaanni pissutsinik danskit ilinniartut paasititsiniaaffiginissaat pingaartumik Kalaallit Nunaat moderniusoq qanoq innersoq pillugu tamanut iluaqutaassasoq.

- Danmarkimi atuarfinni tamani Kalaallit Nunaanni inuuneq atuartitsissutaasalerpat paasisimaqarnerulersimanerat qulakkeerneqassaaq. Soorlu faagini danskimi inuiaqatigiilerinerminilu – oqaluttuarisaanermik samminninnerinnarmiunngitsoq, pisortaq oqarpoq.

Anguniakkat pitsaagaluartut piffissaq sivisusinnaasoq

Inuttut Pisinnaatitaaffiit pillugit Institutip kaamaattuutaa erseqqippoq.

Danmarkimi oqartussat suliniutaat ataqatigiissaarinerallu – kalaallit Danmarkimiittut allat pineqartarnerat naligalugu pineqartalernissaat angusserlugu sukateriffigisariaqarpoq. Ilinniartut kisimik uani eqqarsaatigineqanngillat.

Danmarkip naalagaaffiata suut tamaasa akimorlugit kalaallit nalitut isigineqanngiffii misissorlugillu iliuuseqarfigilissagai Louise Holck neriuppoq, oqarluni kalaallit peqqinnissaqarfimmit aporfissaqartitaasut assersuutissaqqimmata taakku ilanngullugit aaqqiivigineqassasut.

Naallu neriuutit amerlagaluaqisut, nalunaarusiaq ajornartorsiutinik eqqumaffiginnerulernissamut alloriarneruvoq, kisianni nalunarluni kalaallit ilinniartut pitsanngoriaatinik malunnavissunik qaqugu misigisaqartalissanersut. Pisortaq oqarpoq.

- Oqaatigiuminaappoq. Danmarkimi oqartussaqarfiit qanoq sukkatigisumik tusakkatik iliuuseqarfigisinnaassaneraat apeqqutaalluinnassaaq, oqarpoq.

Allanngortoqassappallu siunissami ungasissumiinnissaa ilimagaa, suliarujussuussammat. Taamaakkaluartoq, kalaallit Danmarkimi ilinniartut atugaat tullianik ukiut arlallit qaangiuppata misissuigineqarpata pissutsit ilorraap tungaanut saassimassassut, pisortaq neriuppoq.