Nuuk anorlerajuppallaarpa?
![](/sites/default/files/styles/image_934x467/public/article_images/dash_7_fly_630_9.jpg?itok=0MWsVlxS)
Assartuineq pillugu isumalioqatigiissitap isumaliutissiinerata kingorna sanaartornermut aningaasaliinissamullu pilersaarut Naalakkersuisut upernaaru Inatsisartunut saqqummiunniarpaat.
Assartuineq pillugu isumalioqatigiissitap erseqqissumik inassutigaa Kangerlussuaq matullugu timmisartorsuarnut mittarfik Nuummi sananeqasssasoq tamanna inuiaqatigiinnut akikinnerussammat. Tassungali tapertaliullugu oqaatigineqarpoq Nuup timmisartorfigineqarsinnaanera sukumiisumik misissoqqissaarneqareerpat tamanna aalajangiiffigineqassasoq.
Taamaattumik Namminersorlutik Oqartussat misissorpaat Nuuk timmisartorsuarnut mittarfiliorfigissallugu anorlerajuppallaarnersoq. Tamanna erserpoq Ineqarnermut, Attaveqarnermut Angallannermullu Naalakkersuisup Jens B. Frederiksenip inatsisartunut saqqummiussassaani sisamanngorneq oktobarip 13-at saqqummiunneqartussami.
- Nuummi mittarfimmi pioreersumi silaannaap aalaruluttarnera itisiliiffiusumik misissueqqissaarlugu aallartinneqassaaq, Jens B. Frederiksen saqqummiussassamini allappoq.
Assartuineq pillugu isumalioqatigiissitap aamma inassutigaa Narsarsuaq matullugu Qaqortumi mittarfiliortoqassasoq taassumalu saniatigut inassutigineqartut ilagaat Nuummi umiarsualiviup allilerneqarnissaa.
- Inassuteqaatit taakku marluk Naalakkersuisut tapersernartippaat, kisiannili aamma pingaarnersiuinermut tamarmiusumut ilaatinneqartussaapput, Jens B. Frederiksen oqarpoq.