Aalisartut piniartullu Sakkut pillugit inatsisissaq tapersersorparput
Taamaattorli isumaqatigineqarluni, - toqqammaviatigut isumaqatigivara, meeqqat aallartoorfigineqartarnerat pissutigalugu,
Johan Villadsen Ilulissani aalisartoq piniartorlu taama oqarpoq.
AAMMA ATUARUK Aallaasinik atuisinnaanermut ukiunik minnerpaaffiliinissaq siunnersuutigineqartoq
16-ileereersimasut aallaammik atuisinnaatitaaleratarsinnaanerat taassuma eqqarsarnartoqartippaa.
Aallaammik atuinissamik siusissumik sungiussisimasunut 16-liinissaq utaqqikkatannarsinnaassasoq Johan Villadsen isumaqarpoq, - Immaqa aallaat ilitsoqqutarinagu peroriartortuni taanna ajunngilaq. Kisianni aallaammik ilitsoqqussilluni pisimagaanni taanna aamma ukiua kingusippallaalaarpoq, Johan Villadsen oqarpoq.
AAMMA ATUARUK Sakkut pillugit inatsit Naalakkersuisut sukaterniaraat
Aalisartoq piniartorlu Johannes Steenholdt aallaasit atorneqartarnerannut aamma paarineqartarnerannut inatsimmik sukateriniarnermut isumaqataavoq, - imaanngikkaluarpoq immaqa tamakkua 16-liineqanngitsut ilaatigut aallaasersoq nalusut. Kisianni sillimaniarnissaq siunissaq ungasinnerusoq takorloorlugu iluarnerussagaluarami siunnersuisinnaasumik tamakkuninnga inuusuttuaqqanik ilaqartartunik, Johannes Steenholdt oqarpoq.
AAMMA ATUARUK Sakkut pillugit inatsisip sukaternissaa tapersersorneqarpoq
Inatsimmi sukatersussap aamma kingunerissavaa, aallaasit atorneqannginneranni imassaat immikkoortillugit inaalinneqartalissasut. Tamannalu Aalisartup piniartullu isumaqatigaa.
- Ilaasa umiatsiamiitiinnartaramikkit. Sillimaniarfigalugu inaalilluartarnissaat kissaatiginassagaluarpoq piniartunut taavalu saniatigooralugu pinialuttartunut, aalisartoq piniartorlu Johannes Steenholdt Ilulissat taama oqarpoq.
Sakkut pillugit inatsimmik sukaterinissaq Nuummi Aalisartut Piniartullu Peqatigiiffiata tamakkiisumik tapersersoraaa, siulittaasup Lars Mathæussenip KNR-imut oqaatigaa. Inatsisip sukaterneqarnissaa pillugu aperineqarami ima oqarpoq:
- Annerusumik sunniuteqarnavianngilaq. 16-init inorlugit ukiulimmik piniartumik ilaqanngilagut, Lars Mathæussen oqarpoq.