Sakkut pillugit inatsisip sukaternissaa tapersersorneqarpoq

Sakkut pillugit inatsisip sukaterneqarnissaanut siunnersuut naggataatigut taamaallaat Siumumit itigartinneqarpoq:

- Aallarsersorsinnaanermi aqqaneq marlunnik ukioqarnissamik piumasarisaasup imaaliinnarlugu allangortinneqarnissaa uagut kissaatiginngilarput, Siumup oqaaseqartartua, Jens Immanuelsen oqarpoq.

Siunnersuutip oqaasertaa naapertorlugu aallaasinik pisaarnissamut 16-inik ukioqalereersimanissaq piumasarineqassaaq.

Kisianni siunnersuummut tunngavilersuutini allassimavoq: ”Sakkut pillugit inatsisiliornerup taamatut allanngortinneqarneratigut Namminersorlutik Oqartussat Sunngiffimmi aallaaniarnissamut akuersissutit pillugit nalunaarutaanni 12-inik ukioqalereersimanissamik piumasaqaammik Naalakkersuisut allanngortitsisariaqarnissaannik kinguneqarnissaa soorunami eqqumaffigaarput".

Tamannalu Siumumit maluginiarneqarpoq.

Kisianni angajoqqaat meeqqamik aallaasersorsinnaanissaannik ilinniartitsisarnerat siunnersuutip allanngortinnavianngikkaa, Naalakkersuisut siulittaasuat Kuupik Kleist isumaqarpoq:

- Aallasitaarsinnaanermut ukiut qaaffaamineqassagaluarpata, tamanna kinaassutsimut attuumassuteqartutut isumaqarfiginngilara.

Inuussutissarsiutigalugu piniarsinnaanermut allagartaqartut ullumikkut 2.400 missaanniipput inuillu 8.000 missaanniittut saniatigooralugu piniarsinnaanermut allagartaqarlutik. Nunatsinnilu qassinik ullumikkut aallaaseqarnersoq ilisimaneqanngilaq.

Aallarsersorsinnaanermi aqqaneq marlunnik ukioqarnissamik piumasarisaasup allangortinneqarnissaa aamma Katusseqatigiit Partiiata eqqarsarnartoqartippaa. Ukiorpassuarni ileqqorineqarpoq, meeqqat apersortinneranni aamma aallaamik tunineqartarluni, aallasitaarsinnaanermilu 16-ileeqqaarsimanissaq aalajangiunneqarpat, tamanna ajornarsissasoq erseqqissarpaa. Taamaattorli siunnersuut tapersersorpaa:

- Piniartukkormiut namminneq qitornaminnut ernuttamillullu ilinniartitsissutigisarpaat, aallaasinik qanoq inissiinissaq. Kisianni aamma sukariterisoqarsinnaavoq. Sineriarujussuatsinnimi pissutsit aasigiinngeqimmata ilaatigut tusartarparput, atuisinnaanngitsoqartoq, Katussqatiqqiit Partiianniit Jakob Skade oqarpoq.

Siunnersuutip ataatsimiititaliamit suliarineqarnissaa peqqamik iluatsinneqarpoq.

Sakkut pillugit inatsit sukaterneqassappat, Naalakkersuisut naalagaaffimi oqartussanut attaveqartariaqassapput. Naalakkersuisullu taamaaliorniarlutik akissuteqaamminni neriorsuuteqarmata, Inuit Ataqatigiit oqaaseqartartuata Hans Aronsenip siunnersuut naalakkersuisoqatiminneeersoq itigartinniaraluarpaa.

Kisianni Hans Aronsenip oqaaseqaatini oqaluttarfiimmit atuareerlugu, ilanngullugu oqaatigaa, ataatsimiititaliamut ingerlanneqassasoq amerlanerusunit piumasarineqassappat, tamanna peqataaffigisinnaallugu.

Inuit Ataqatigiilli aallaqqaammut isumartik aalajangiusimasimagaluarpassuk, siunnersuut ataatsimiititaliamut ingerlateqqinneqarsimanavianngikkaluarpoq, Inuit Ataqatigiit Siumullu katillutik amerlanerugamik.

Siunnersuummi immikkuualuttut isumaqatigiinngissutaagaluartut, Kuupik Kleist isumaqarpoq, aallaasit mianersuuneqartariaqarnerat isumaqatigiissutaasoq, oqallinnerup inerneri:

- Aamma isiginngitsuusaarneqarsinnaanngilaq, Nunatsinni inuunermik navianartorsiortitsisumik pinerluttoqarnerani aamma aallaasit amerlasuutigut atorneqartarmata. Tassalu mianersornissaq Naalakkersuisuni pingaarnerpaavoq, Kuupik Kleistip nassuiaavoq.

Siunnersuut ataatsimiititaliami suliassanngortinneqarpoq. Sakkut pillugit inatsit qanorpiaq allanngortinneqassanersoq, siunnersuut ataatsimiititaliami suliarineqarpat aammalu pilersaarutaasutut maajip 19-ani aappassaaneerlugu suliarineqarpat ersarinnerulissaaq.

Kisianni inatsisip sukaterneqarnissaa siunissami ungasinnerusumi aatsaat pisinnaavoq, naalagaaffimmi oqartussat suliareqqaartussaammassuk.