Demokraatit: IA-p mittarfissualiassanut pilersaarutaat nunatta aningaasaqarneranut ajalusoortitsissaaq
- IA-kkut isummernerat, ullormiik ullormut nikinnerat taamatut uparuarparput aamma peqataaffigisinnaanagu nalunaaruteqarpugut ersarissumik, Demokraatineersoq Nivi Olsen oqarpoq.
Inuit Ataqatigiit mittarfissualiortitsernissamut pilersaarutitik sapaatip akunnerata siuliani saqqummiuppaat.
Nuummi mittarfik 2200 meteriussaaq. Ilulissani mittarfiup kingusinnerusukkut 2200-mut tallillerneqarsinnaanera qulakkeerneqassaaq. Kujataanilu Qaqortumi mittarfiup taasissutigineqannginnerani sukumiinerusumik misissuiffigineqarnissaa partiip kissaatigaa.
AAMMA ATUARUK Aaqqiissutissap ataatsimoortuunissaa Naalakkersuisut aalajangiusimavaat
Tamannalu Demokraatit isumaqatiginngilaat. Mittarfissualiortiternissamut pilersaarutit Naalakkersuisut saqqummiussaat Demokraatit taperseroraat, Nivi Olsen oqarpoq.
Aningaasaqarnikkut ajalusoortitsissasoq
Nuummi Ilulissanilu mittarfiit tallilerneqarpata tamanna nunatta karsianut ukiuni tullerni 25-ni aningaasanik sipaaruteqartitsissasoq, Deloittep misissueqqissaarnerata takutippaa.
Naatsorsuinernili aallaaviuvoq, Kangerlussuarmi Narsarsuarmilu mittarfiit qulimiguulinnut mittarfinngussasut. Tamannalu Demokraatit tapersersorpaat.
AAMMA ATUARUK Inuit Ataqatigiit naalakkersuisuutitaqartunit taperserneqanngitsut
Tamaammat IA-p mittarfissualiassat pillugit siunnersuutaat nunatta aningaasaqarnikkut ineriartornissaanut ajalusoortitsissasoq, Nivi Olsen oqarpoq.
- Taavalu aamma apeqquserlutigu sooq misissuinerit taama ersaritsigisumik takutitsisut nunatta angingaasaqarnera ilorraap aallarnissaanut periarfissat IA-kkut taamatut politikkeqarfiginninnerat sakkortuumik uparuarumallugu taamatut oqariartuuteqarpugut, Nivi Olsen oqarpoq.
AAMMA ATUARUK IA: Nuummi mittarfik siulliunneqassaaq Kangerlussuarlu ineriartortinneqarluni
Naalakkrsuisut mittarfissualiassanut siunnersuutaanni tapersersuinertik, Kim Kielsenimut, Naalakkersuisooqateqalernissamut isumaqatigiinniartumut, tapersiinerunngitsoq, Nivi Olsen oqarpoq.