Simonsen: Aaqqiissutissap ataatsimoortuunissaa Naalakkersuisut aalajangiusimavaat

Naalakkersuisulli maanna pilersaarusiartik aallaavigalugu sulinertik nanginniaraat, Attaveqaqatigiinnermut naalakkersuisup Simon Simonsenip, tusagassiutinut nalunaarummi oqaatigaa:

- Nuummi 2.200 meterimik Imarpik qulaallugu timmisartunut mittarfiliortoqassasoq, aammalu nunatsinni angalaneq pisariinnerulersillugu nunatsinni attaveqaqatigiinneq tamarmi kivinneqassasoq, ilaatigut Inuit Ataqatigiit Naalakkersuisut isumaqatigimmagit nuannaarutigaara, naalakkersuisoq Simon Simonsen oqarpoq, nangillunilu:

- Kisianni erseqqissassavara Naalakkersuisut Ilulissani aamma Nuummi 2.200 meterimik mittarfiliortoqarluni aammalu Qaqortumi 1.500 meterimik nunap immikkoortuani mittarfiliortoqarluni aaqqiissutissap ataatsimoortuunissaa Naalakkersuisut aalajangiusimammassuk aammalu suli sulissutigalugu, Simon Simonsen oqarpoq.

AAMMA ATUARUK Koalitionspartierne afviser IAs lufthavnspakke

Nuummi mittarfiup tallineqarnissaa partiip siunnersuutigaa. Sara Olsvigip tusagassiortunik katersortitsinermi oqaatigaa Ilulissani mittarfiup inissimaffissaani nutaami tallilerneqarnissaa kissaatigalugu. Aallaqqaammulli 2200 meteriussanngilaq. Mittarfiulli kingusinnerusukkut 2200-mut tallillerneqarsinnaanera qulakkeerneqassaaq.
Qaqortumi mittarfittaassap tikikkuminassusiata misissorneqaqqaarnisssaa pillugu mittarfissaq kingorna aatsaat sanaartorneqalissasoq, Inuit Ataqatigiit siunnersuutigaat.

Kangerlussuup mittarfiliortiternissanut isumaqatigiissummi ilanngunneqarsimanissaa, Inuit Ataqatigiit siunnersuutigaat.

- Taamatut oqareerlunga IA-p saqqummiussaa arlalitsigut Naalakkersuisut siunnersuutaannut assingusoq naammagisimaarlugu maluginiarpara, taamaattumillu Ukiaanerani ataatsimiinnerup nalaani Inatsisartut ataatsimiittarfianni inatsisissatut siunnersuutip suliarineqarnissaanut neriulluarpunga, Attaveqaqatigiinnermut naalakkersuisoq Simon Simonsen oqarpoq.