Kalaallit Nunaata avannarpiaani qeqertamik nutaamik nassaartoqarpoq
Qeqertaq nassaarineqartoq nunarsuatsinni qeqertat avannarpasinnersarissagunarpaat, Kalaallit Nunaatalu avannarpasinnersaani sinerissamiit kilometerinik sisamaannarnik ungasitsigaaq, qeqertamiit manna tikillugu avannarpasinnersaasumiit, Oodaaq-miit, meterinik 200-nik avannarpasinnerulluni. Oodaaq 1978-imi nassaarineqarpoq, tusagassiorfimmi Reuters-imi ullumi taama allaaserinnittoqarpoq.
Qeqertamik nassaartuuvoq, amerikamiu issittumi ilisimatusartoq, Dennis Schmitt, qeqertarlu atsersimavaa; Stray Dog West. Tunup avataani qeqertamik, Warming Islandimik, sermimik qallersimasimasumik, Dennis Schmitt aamma siorna nassaartuuvoq.
Stray Dog West meterinik 60-iinnarnik takitigigaluartoq nunat assigiinngitsut qalasersuarmik piginnittussaanermik – suliluunniit pingaaruteqarnersumik; immap naqqani pisuussutinik piginnittussaasutut pilerngunnerannut pingaaruteqassaaq.
-Qeqertaarannguaq nunat assigiinngitsut killeqarfilerngusaannerannut pingaaruteqarsinnaaqaaq, sermerli aakkiartortillugu qeqertaaqqanik nassaartarnissaq ilimanarpoq, Nunat Tamat piginnaatitaaffiinut professori, Oxford Universitetimeersoq, Stefan Talmon Reutersimut oqarpoq.
Sulili paasiniaasoqartariaqarpoq ilumut qeqertaanersoq paasiniarlugu, imaluunniit ikkarluinnaanersoq. Inatsisit Nunanut Tamanut atuutsinneqartut malillugit aatsaat qeqertatut taaneqarsinnaavoq nikittanngikkuni, ulinngasumilu nuisaannartaruni. Qeqertaaguni sumi aalisaqqusaanermut killeqarfeqarnermullu pingaaruteqassaaq.
Qeqertap sananeqaataa aqingaarmat imaassinnaavoq aamma qeqertaq sikorsuarnit ajanneqarsinnaasoq, taamaammallu qeqertap sumiiffia qanoq ilisoqarsinnaaneranut assersuutitut taaneqaannarsinnaagallarpoq, siunissamili killeqarfiit inissinneqarnissaannut pingaaruteqalersinnaalluni.
