Bussimik angalaarneq iluatsilluartoq

Kalaallit Danmarkimiittut inuuniarnikkut ajornartorsiortut sunik ajornartorsiuteqarnersut qanorlu iliorluni ikiorserneqarsinnaanersut paasiniarlugu busserluni angalaneq iluatsilluartutut naliliiffigineqarpoq, tamatigut orniguttut 40-it missaaniitarsimagamik.

Paasiniarneqarpoq siunissami ikiuiniarnermi periutsit suut atorneqassanersut. Imigassartorpallaarneq, ikiaroorneq, angerlarsimaffeqannginneq inuttullu atugarliortuuneq ajorntorsiutaanerusutut oqaatigineqarput.

Inunnik isumaginninnermik sammisaqartut 20-it Danmarkimi illoqarfinnut anginernut angalaqqammerput, illoqarfiit anginerit Aalborg, Århus, Esbjerg, Odense, Københavnilu angalaffigineqarlutik. Illoqarfinni taakkunani kalaallit ajornartorsiutaat suunersut pillugit kalaallit illuini ataatsimiititsinerit ingerlanneqartarput, ajornartorsiutit sorpiaanersut qanorlu ililluni ikiuiniartoqarsinnaanersoq paasiniarneqartarluni.

Suliaq tamanna 2008-p tungaanut ingerlanneqartussaavoq, qanoq ingerlariaqqittoqartassanersoq ilisimasalinnit nalilersorneqartassalluni.

Københavinimi Kalaallit Illuutaanni isumaginninnermut siunnersorti Inuk Sonne oqarpoq kalaallit akornanni imigassaq, ikiaroorneq, angerlarsimaffeqannginneq, inuttullu ajornartorsiutit ajornartorsiutaanerusut. Ilisimaneqanngilaq kalaallit qanoq amerlatigisut tamakkuninnga ajornartorsiuteqarnersut.

Isumaginninnermut ministereqarfiup kalaallinik ikiortarialinnik misissuisitsereernerata kingorna taamatut iliuuseqarneq aallartinneqarpoq, tamannalu aamma Namminersornerullutik Oqartussaniit aningaasaleeqataaffigineqarpoq.