Qinersiartortut aatsaat taama ikitsigisut
Inatsisartunut ippassaq qinersinermi nuna tamakkerlugu qinersisinnaatitaasut 65,8 procentii qinersiartorput, taamaalillunilu 1979-imili Namminersornerullutik Oqartussat eqqunneqarmatali aatsaat taama appasitsigaluni.
Inatsisartunut 2018-imi qinersigatta qinersisinnaatitaasut 71,9 procentii qinersiartorput.
AAMMA ATUARUK Naleraq isumaqatigiinniarnissamut piareersartoq
Qinersiartortut taama ikitsiginerat Klaus Georg Hansenip, Nunamut Namminermut Immikkoortortaqarfimmi immikkoortortaqarfimmut pisortaq, Inatsisartunullu qinersinissamut piareersaanermut akisussaasuusup, uissuumminartuusoraa.
Qinersiartortut ukiut ingerlanerani amerlassusaat:
1979: Taasinerit procentiat: 69,6%
1983: Taasinerit procentiat: 75,1%
1984: Taasinerit procentiat: 66,8%
1987: Taasinerit procentiat: 69,6%
1991: Taasinerit procentiat: 67,1%
1995: Taasinerit procentiat: 69,6%
1999: Taasinerit procentiat: 76%
2002: Taasinerit procentiat: 74,6%
2005: Taasinerit procentiat: 74,9%
2009: Taasinerit procentiat: 71,3%
2013: Taasinerit procentiat: 74,2%
2014: Taasinerit procentiat: 72,9%
2018: Taasinerit procentiat: 71,9 %
2021: Taasinerit procentiat:65,8 %
Tusarfik: Inatsisartut
- Qinersiartortut ikinneri uagut aamma qimerloorpagut. Tupaatigalugit oqartariaqarpunga. Kisitsisitigut takuneqarsinnaasunut ilaasut tassaavoq, Nuummi qinersiartortut ikeqimmata. Nuummi qinersartut 61,0 procentii qinersiartorput, Klaus Georg Hansen oqarpoq.
Ilulissani qinersisinnaatitaasut 71,4 procentii qinersiartorput, tamannalu Klaus Georg Hansenip naammaginarluartuunerarpaa.
Tamakkiisumilli isigalugu nunatsinni qinersisinnaatitaasut Nuummi najugaqarmata, nuna tamakkerlugu qinersisut amerlanerunnginneranut Klaus Georg Hansenip peqqutaaqataasinnaasoraa.
Tamatumanilu allakkatigut qinersinissamik kaammattuivissorneq, ullup qeqqata siornani silarlunnera taavalu qinersiartortut siuleriiaattariaqarsimanerat, taamaalillunilu qinersinerup nalunaaquttap akunneranik sivitsorneqartariqarnera peqqutaasoraa:
- Inuit ilaat pissutsit taamaammata angerlarsimaannarsimagunarput. Tamatumani kommuni pisuunngilaq. Kommmunimi sulisut sulilluavissorput. Tassalu Nuummi pissutsit immikkuullarimmata qinersisartut ilaat qinersiartunngitsoorsimagunarput.
AAMMA ATUARUK IA borgmesteriutitaqarnerulersut
Nuummili qinersivissap ataasiinnaanera qinersinissamut piareersaanermut akisussaasuusup patsisaasorinngilaa.
- Qinersivik pisarnertut ataasiinnaavoq. Arlalinnillu qinersiveqassagaluaraanni allafissornikkut unammillernartorpilussuussaaq, assersuutigalugu sulisoqarnikkut, Klaus Georg Hansen oqarpoq.
1979-imi namminersorneruleratta qinersiartortut qinersisinnaasut 69,6 procenteraat. Tassa taamani qinersiartortut ikinnerpaallutik.