Oqaaseqartartoq: Taava aamma uagut Ruslandip issittortaanukassaagut
Akuerineqassappata uagut aamma taamaaliorsinnaasariaqarpugut.
Rusland Kalaallit Nunaanni akissaasersugaanngitsunik sinniisoqarnissamut periarfissaqartinneqassappat tamanna danskit naalakkersuisuinit piumasaqaatigineqartariaqarpoq.
Konservativit Folketingimi nunatsinnut tunngasunik oqaaseqartartuat, Rasmus Jarlov KNR-imut oqarpoq.
Akissaasersugaanngitsumik sinniisoq suua?
Akissaasersugaanngitsumik sinniisoq diplomatiunngilaq, inuinnaavorli ulluinnarni suliffimmi saniatigut nunani inuiaqatigiinniluunniit sinnerlugit sinniisuusoq.
Suliassaq amerlanertigut akissarsiaqarfiuneq ajorpoq, nunalli allat kulturianik, niuerneranik, politikkianik inuinnaalluunniit nunamut allanut soqutiginninnerannik siuarsaasarluni.
Nunat sorliit nunatsinni pisortatigoortumik sinniisoqartut uani takusinnaavatit.
- Ruslandimut akerlinganik piumasaqaasiornissamut periarfissaqarluarsoraara, matumani russit issittortaanni susoqarneranik assingusumik paasisaqarnissamut ilaatigut periarfissaqarsinnaasariaqarluta.
Taassuma Kunngeqarfik Danmark Ruslandip issittortaani pisortatigoortumik sinniisoqartariaqarsoraa. Tamanna russit nunap immikkoortuani tassani sulerinerannut ilisimasaqarnerulersitsissaaq.
Konservative: Russinut tunngatillugu qularutiginnittoqarli
Rusland Kalaallit Nunaanni akissaasersugaanngitsumik sinniisoqalerusuttoq russit nunanut allanut tunngasunut ministeriata, Sergei Lavrovip sapaatip-akunnerata siuliani nalunaarutigaa.
Nunanut allanut tunngasunut naalakkersuisoq, Steen Lynge (D) tamatumunnga tikilluaqqusivoq. Danskit nunanut allanut tunngasunut ministeriata, Jeppe Kofodip (S) kissaateqarneq aamma taperserpaa.
- Rusland Savalimmiuni akissaasersugaanngitsumik sinniisoqareerpoq, taannalu ukiorpassuarni atuulluni. Tamanna nalinginnaalluinnarpoq, paasiuminarlunilu, Kofod Ritzaui-imut oqarpoq.
AAMMA ATUARUK Tusagassiuutit: Rusland nunatsinni sinniisoqarfeqalernissaa naalakkersuisut akuerigaat
Nunatsinni ilaatigut Korea Kujallermit, Tysklandimit Tuluit Nunaaniillu akissaasersugaanngitsumik sinniisut pisortatigoortut ullumikkut aqqaneq-marluupput. Tamatuma saniatigut USA Islandilu sinniisumik Nuummiittuutitaqarput.
Danmarkilli russit nunatsinni sinniisuutitassaminnik toqqaarusunnerat qularutiginerusariaqaraat, Rasmus Jarlov isumaqarpoq.
Akissaasersugaanngitsumimmi sinniisoq Kalaallit Nunaanni takutitsinerinnarmut atorneqarani allarpassuarnut aamma atorneqarsinnaasoq, politikeri naliliivoq.
- Nakkutilliisutut atorneqarsinnaapput, tassa Kalaallit Nunaanni susoqarneranik tusagaqarniarnermut atorneqarsinnaallutik. Tusartitsinerit russit pigisaat aammali sakkutooqarnermut atatillugu uagut perusussinnaasagut. Taamatullu pilersaarusiornerup annertuup suunera soorunami ernumassutigisinnaavarput.
Venstrep danskit naalakkersuisui taperserai
Folketingimili partiit annerpaasa tulliata, Venstrep nunatsinnut tunngatillugu oqaaseqartartua, Christoffer Melson eqqissisimalluinnarpoq.
Taassuma Ruslandip akissaasersugaanngitsumik sinniisoqarniarnerat ”tulluarluinnartuusoraa”.
- Tamanna aamma ajorinngilarput, naalakkersuisullu isumaqatigalugit. Tulluartumik inissiinerorpasippoq, tamannalu isornartorsiunngilarput.
AAMMA ATUARUK Tusagassiuutit: Russit Kalaallit Nunaanni sinniisoqarfimmik ammaarusuttut
Christoffer Melsonip nunatsinni akissaasersugaanngitsumik sinniisoqarnera nunatta Danmarkilluunniit Ruslandimut attaveqarneranut allannguinavianngissoraa.
- Russit ulluinnarni oqaloqatiginissaannut periarfissaqarluarpugut. Taamaammat tamanna alloriarujussuarnerusorinngilara, allatigulluunniit.
KNR-ip nunanut allanut tunngasunut ministeri, Jeppe Kofod (S) apersorumavaa. Tamannali periarfissaanngitsoq, taassuma ukiaanerani sulinngiffeqarnera pissutigalugu, Nunanut allanut tunngasunut ministereqarfik paasissutissiivoq.
