Tusagassiuutit: Rusland nunatsinni sinniisoqarfeqalernissaa naalakkersuisut akuerigaat

Ruslandip nunatsinni sinniiisoqarfeqalernissaa tallimanngormat akuerineqarpoq.

Russit nunanut allanut tunngasunut ministeriat, Sergei Lavrov,

danskillu nunanut allanut tunngasunut ministeriat, Jeppe Kofod Moskvami tallimanngormat ataatsimeeqatigeereerlutik taama oqarpoq.

Naalakkersuisut sinniisoqarfeqalernissaq akuerigaat Sermitsiaq.ag nittartakkamut allappoq. 

- Kalaallit Nunaat nunanut allanut inuussutissarsiuteqarnermut suleqatiginninnissamut ammavoq. Taamaammat russit Kalaallit Nunaanni sinniisoqarfeqalerusunnerat tikilluaqquarput.

Russit Kalaallit Nunaannut sinniisoqarfimmi pilersitsinermigut, neriuppunga Rusland Kalaallit Nunaallu suleqatigiinnerulissasut. Assersuutigalugu aalisakkanik niueqatigiinneq ineriartortinneqarneratigut, Steen Lynge Sermitsiaq.ag-mut oqarpoq.

Sermitsiaq.ag-p ilanngullugu allaaseraa russit sinniisoqarfeqalernissaminnut akuerisaasut.

Nunanut allanut tunngasunut ministeri: Pissusissamisoorpoq

Ruslandip sinniisoqarfittaarusunnera pissusissamisoortoq, danskit nunanut allanut tunngasunut ministeriat, Jeppe Kofod oqarpoq.

- Nunat assigiinngitsut – Tjekkiet, Finland, Frankrig allallu arlallit Kalaallit nunaani sinniisoqarfeqarput, Rusland Savalimmiuni ukiuni arlalinni sinniisoqarfeqarpoq, tamannalu pissusissamisoorpoq, jeppe kofod oqarpoq.

AAMMA ATUARUK Tusagassiuutit: Russit Kalaallit Nunaanni sinniisoqarfimmik ammaarusuttut

Sinniisoqarfimmi sulisussaq akissarsiaqartinneqassanngilaq, atorfimmi tassaniittut inuussutissarsiornermi ingerlataqartuukkajuttarput immaqaluunniit eqqartuussissuserisut, taakku naalagaaffiup allanut attaveqarneranut nunanulluunniit allanut niuerneranik suliaqartarput.